Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 481 Hüküm no: 571 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaya b. Yani’nin Şirin v. Şahban aleyhindeki alacak davasını ispat edemediği Taşçı tâifesinden olup mahmiye-i İstanbul’da Karaman sûkunda sâkin Kaya v. Yani nâm zimmî meclis-i şer‘-i şerîfde bâ‘isü hâze’s-sifr Şirin v. Şahban nâm zimmî muvâcehesinde üzerine da‘vâ ve takrîr-i kelâm edip mezbûr Şirin’e taşçılık san‘atından beher yevm otuzar akçe ücret ile nefsimi îcâr ol dahi ber vech-i muharrer istîcâr ve kabûl ettiğinden doksan gün hizmetim sebkat edip doksan günde müctemi‘ olan iki bin yedi yüz akçe ücretimin bin sekiz yüz akçesini bana def‘ ve teslîm ben dahi yedinden ahz u kabz edip dokuz yüz akçe hakkım zimmetinde bâkī kalmağla hâlâ suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr Şirin cevâbında müdde‘î-i mezbûru ber vech-i muharrer yevmî otuzar akçe olmak üzre istîcârını ikrâr lâkin altmış gün hizmeti sebkat etmişdir deyû ziyâdeyi otuz günü münkir olmağla müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-hakīka müdde‘î-i mezbûr Kaya’nın kabzını mu‘terif olduğu bin sekiz yüz akçeden ziyâde otuz gündelik olmak üzre dokuz yüz akçe dahi zimmetinde deyni olmadığına mezbûr Şirin’e yemîn teklîf oldukda ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebince müdde‘î-i [mezbûr]dan bilâ-beyyine ber vech-i mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve [elf]. Şuhûdü’l-hâl: İbrahim Çelebi b. Ahmed, Mehmed b. İdris, İsmail b. Mustafa, Ebûbekir b. Hüseyin, Ali b. Bâli.