Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 482 Hüküm no: 572 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Fazlullah’ın Bedros v. Matos ve Serkis v. Minas’ta alacağı olduğu Mahmiye-i İstanbul’da Kebeciler hanında sâkin el-Hâc Mehmed b. Fazlullah nâm kimesne meclis-i şer‘-i şerîfde mahmiye-i mezbûrda Sulumanastır mahallesinde mütemekkin Bedros v. Matos ve Yenimahalle’de sâkin Serkis v. Minas nâm zimmîler muvâcehelerinde üzerine da‘vâ ve takrîr-i kelâm edip merkūmân Bedros ve Serkis’in bundan akdem yedimden iştirâ ve kabz eyledikleri adedi beynimizde ilm-i şer‘î ile ma‘lûm elvân bogasi bahâsından elli beş esedî guruş hakkım olup bundan akdem meblağ-ı mezbûr elli beş esedî guruşun nısfı olan yirmi yedi buçuk guruş merkūm Bedros ve nısf-ı âharı olan yirmi yedi buçuk guruşu mesfûr Serkis’den taleb ve da‘vâ eylediğimde bana edâdan imtinâ‘ ederler, merkūmân Bedros ve Serkis’e suâl olunup meblağ-ı mezbûr elli beş guruşun bana alıverilmesi matlûbumdur dedikde gıbbe’s-suâl merkūmân Bedros ve Serkis cevâblarında ilm-i şer‘î ile ma‘lûm iştirâ ve kabz eylediğimiz bogasi bahâsından zimmetimizde müdde‘î-i mezbûra vâcibü’l-edâ ve lâzımü’l-kazâ elli beş esedî guruş deynimiz vardır deyû tâyi‘an ikrâr ve i‘tirâf etmeğin mûcebince ba‘de’l-hükm, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Yahya Çelebi b. Mehmed, İbrahim b. Mehmed, Hüseyin b. Ali, Kenan b. Abdullah, Hacı Mustafa b. ( ).