Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 482 Hüküm no: 573 Orijinal metin no: [96b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahadır v. Manuk’un İsayi v. Barsam aleyhindeki alacak davasında sulh olunduğu Lağımcı tâifesinden olup mahmiye-i İstanbul’da Kumkapı kurbunda sâkin Bahadır v. Manuk nâm zimmî meclis-i şer‘-i şerîf-i enverde İsayi v. Barsam nâm zimmî muvâcehesinde üzerine da‘vâ ve takrîr-i kelâm edip bundan akdem mîrîden verilmek üzre kırk esedî guruş ücret ile ben Beç sefînesine me’mûr olup mezbûr İsayi bana kefîl olmağla ücretim olan meblağ-ı mezbûru taraf-ı mîrîden bi’t-tamâm ahz u kabz edip meblağ-ı mezbûrdan yirmi guruşu mezbûr İsayi’ye cihet-i karzdan zimmetimde lâzımü’l-edâ deynim olan yirmi guruşa takās edip ol dahi mukāssa ve kabûl ve dokuz guruşunu dahi bana edâ ve teslîm ben dahi ahz u kabz edip yirmi guruş hakkım zimmetinde bâkī kalmağla suâl olunup meblağ-ı bâkī-i mezbûru dahi bana edâya tenbîh olunmak matlûbumdur dedikde gıbbe’s-suâl mezbûr İsayi cevâbında fi’l-hakīka kaziyye minvâl-i meşrûh üzre olduğunu ikrâr lâkin mukaddemâ meblağ-ı mezbûru bir def‘a dahi benden taleb ve da‘vâ edip beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûresinden beş guruş üzerine benimle müsâlaha olup bedel-i mezbûru ba‘de’l-kabûl ziyâdeye müte‘allika da‘vâdan zimmetimi ibrâ eyledi deyû def‘le mukābele edicek gıbbe’l-istintâk ve’l-inkâr, mezbûr İsayi’den sıdk-ı makāline mutâbık beyyine taleb olundukda mahmiye-i mezbûrede Mehmed Ağa mahallesinde sâkin Yahya b. Ali ve Beşir b. Abdullah nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Bahadır meblağ-ı bâkī yirmi guruşu mukaddemâ İsayi’den da‘vâ edip beynlerinde nizâ‘-ı küllî vukū‘undan sonra muslihûn tavassut edip da‘vâ-yı mezkûresinden beş guruş üzerine mezbûr İsayi ile müsâlaha ve bedel-i mezbûru bizim huzûrumuzda ahz u kabz ve bâkīden zimmetini ibrâ ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîli’t-tezkiyye şehâdetleri makbûle olmağın mûcebiyle mezbûr Bahadır bî-vech mu‘ârazadan men‘ olunup [97a] mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, Mehmed b. İdris, Ali b. Bâli, Aragos v. Andon, Ovanes v. Bartın, Asvador v. Baron, Karabet v. Kiragos.