İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 73 Hüküm no: 29 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hacı Receb’in Satılmış’ın muhallefatından hissesini aldığı Bâtın-ı kitâbda ismi mastûr olan İsmail b. Hacı Receb derûn-ı kitâbda ismi mastûr olan Satılmış nâm müteveffânın muhallefâtına vâzı‘ü’l-yed olduğunu mukır olup mahmiye-i Kostantıniyye’de yeniçeri beytü’l-mâli emîni olan fahrü’l-ümenâ Mehmed Subaşı b. İlyas muvâcehesinde meclis-i şer‘de bi’t-tav‘ ikrâr ve i‘tirâf edip müteveffâ-yı mezbûrun muhallefâtı semeninden emîn-i müşârün-ileyh yedinde makbûz olan altı bin yedi yüz akçeyi verâsetim hasebiyle emîn-i merkūm yedinden bi’t-tamam ahz ü kabz eyledim dedikde mukırr-ı mezbûru ikrâr-ı meşrûhunda emîn-i merkūm bi’l-muvâcehe tasdîk etmeğin kayd olundu. Fi’t-târihi’l-mezbûr. Şühûdü’l-hâl: Es-sâbikūn.