Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 484 Hüküm no: 575 Orijinal metin no: [97a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Kadri’nin menzil hissesini Yusuf b. Hüseyin’e satması Mahrûse-i Galata müzâfâtından kasaba-i Kasımpaşa’da Sirkeci mahallesinde sâkine Ayşe bt. Kadri nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olan Mustafa Çelebi b. Mehmed ve Osman b. Ömer şehâdetleriyle şer‘an sâbit olan Ramazan b. İsmail nâm kimesne meclis-i şer‘-i şerîf-i enverde müvekkile-i mezbûrenin üveyi babası bâ‘isü hâze’l-kitâb Yusuf b. Hüseyin mahzarında bi’l-vekâle ikrâr ve takrîr-i kelâm edip kasaba-i mezbûrede Küçük Piyâle Paşa mahallesinde vâki‘ bir tarafdan imâma meşrûta vakıf menzil ve bir tarafdan Medîne-i Münevvere vakfından olup Ahmed Efendi kızı demekle ma‘rûfe hâtun tasarrufunda olan menzil ve bir tarafdan el-Hâc Mehmed bostanı ve bir tarafdan tarîk-i hâs ile mahdûd dâhiliyyesinde bir bâb fevkānî ve iki bâb tahtânî oda ve bir matbah ve su kuyusu ve eşcâr-ı müsmire ve gayr-ı müsmire bahçe ve kenîf ve hâriciyyesinde bir bâb fevkānî oda ve tahtında odunhâne ve kenîfi müştemil mülk menzilin üç sehimi mezbûr Yusuf’un mülk-i müşterâsı ve üç sehimi müvekkilem mezbûrenin babası mezbûr Kadri ve li ebeveyn er karındaşı Mustafa’dan müntakile mülk-i mevrûsu olmağla hâlâ üç sehim hissesi mezbûr Yusuf tarafından îcâb ve kabûl-i hâvî bey‘-i bâtt-ı sahîh-i şer‘î ile yüz yedi buçuk esedî guruşa bey‘ ve teslîm ol dahi ber vech-i muharrer iştirâ ve kabz ve kabûl eylediğinden sonra semeni olan meblağ-ı mezbûr yüz yedi buçuk guruşu üveyi babası mezbûr Yusuf yedinden tamâmen ahz u kabz eyledi ba‘de’l-yevm menzil-i mahdûd-ı mezkûrda müvekkilem mezbûre Ayşe Hâtun’un bir vechile alâka ve medhali kalmayıp mezbûr Yusuf’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi selh-i Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Osman imâm-ı mahalle-i mezbûre, Mustafa Çelebi b. Mehmed el-Müezzin, Mehmed Çelebi el-Müezzin, Mehmed b. Mehmed.