Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 484 Hüküm no: 576 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in Hacı Hüseyin b. Ramazan’da alacağı kalmadığı Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîf-i enverden Mevlânâ Abdullah Efendi b. el-Hâc Veli irsâl olunup ol dahi Emetullah bt. Mustafa nâm hâtunun mahmiye-i İstanbul’da Beyceğiz mahallesinde sâkine olduğu menzile varıp zeyl-i vesîkada muharrerü’l-esâmî müslimîn huzûruna akd-i meclis-i şer‘-i mübîn eyledikde mahmiye-i mezbûrda Ali Paşa-yı Atîk mahallesinde sâkin iken bundan akdem vefât eden Ömer Efendi’nin sulbiye sagīre kızı Ayşe’nin kıbel-i şer‘den mansûbe vasîsi ve vâlidesi olan zâtı ma‘rifet-i şer‘iyye ile ârifân el-Hâc Hüseyin b. Nasuh ve İbrahim Ağa b. Hasan nâm kimesneler ta‘rîfleriyle mu‘arrefe olan Fâtıma bt. Mehmed Ağa nâm hâtun meclis-i ma‘kūd-ı mezbûrda, kıbel-i şer‘den vasiyye-i mezbûre üzerine nâzır ta‘yîn olunan bâ‘isü hâze’l-kitâb el-Hâc Hüseyin b. Ramazan mahzarında ikrâr ve takrîr-i kelâm [edip] sagīr-i mezbûrenin malından sekiz yüz guruş mezbûr el-Hâc Hüseyin yediyle âharlara (…) ve istirbâh olunmuşidi hâlâ meblağ-ı mezbûru merkūm el-Hâc Hüseyin zimem-i nâsdan cem‘ ve tahsîl ve bana teslîm ben dahi ahz u kabz eyledim. Târih-i kitâba gelince sagīr-i mezbûre malından mezbûr el-Hâc Hüseyin yedinden ve zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î vâki‘-i hâli Mevlânâ-yı mezbûr mahallinde tahrîr ba‘dehû ma‘an irsâl olunan Yusuf b. Ömer ile meclis-i şer‘a gelip alâ vukū‘ihî inhâ ve takrîr etmekle mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Eş-Şeyh Mustafa Efendi b. Abdüssamed, el-Hâc Hüseyin b. Nasuh, İbrahim Ağa b. Hasan, Mustafa Efendi b. Abdülaziz.