İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 97 Hüküm no: 52 Orijinal metin no: [12a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal tarafından zabtedilen Mehmed b. Yusuf’un muhallefatından üç eşinin hisselerini aldığı Mahmiye-i Kostantıniyye mahallâtından Suhte Sinan mahallesinde bundan akdem vefât eden Suhte Memi diye şehîr merhûm Mehmed b. Yusuf’un zevceleri Râziye bt. Abdullah, Nâzenin bt. Abdullah ve Aynî bt. Abdullah nâm hatunlar kıbellerinden vekâleti bimâ hüve nehcü’s-sübût şer‘an sâbit olan Ahmed b. Abdullah nâm kimse meclis-i şer‘-i şerîfe hâzır olup merhûm-ı mezbûrun muhallefâtına vâzı‘-ı yed olan mahmiye-i mezkûrede vâki‘ râcilîne mahsûs beytü’l-mâl emîni İsa Çelebi b. Nasuh mahzarında, müteveffâ-yı mezbûrun muhallefâtından müvekkilât-ı mezbûrâtının hisseleri olan râyicü’l-vakt sekiz bin yüz doksan altı akçe-i Osmânîyi vekâlet-i mahkiyesi hasebiyle emîn-i mezbûr yedinden ahz ü kabz ettiğini, zimmetinde bir akçe ve bir habbe hakkı kalmadığını ikrâr eyledi. Vâki‘ ikrâr mukarrun lehü’l-merkūm tarafından vicâhen ve şifâhen tasdîk edildi. Cerâ zâlike ve hurrire fî-evâsıtı Recebi’l-mürecceb li-sene elf. Şühûdü’l-hâl: Osman Çelebi b. Timur, Mehmed Çelebi b. Mustafa, Ömer Bey b. Abdullah, Mehmed Bey b. Abdullah el-cündî