İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 97 Hüküm no: 53 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in Meleki Hatun üzerine açtığı davayı ispatlayamadığı Mahrûse-i Kostantıniyye’de Ak Şemseddin mahallesinde vefât eden Mir Mehmed Çavuş b. İskender Çavuş nâm kimesne[nin] veled-i sagīri Kaya’ya kıbel-i şer‘-i şerîfden vasî olan Mehmed Bey b. Ahmed nâm kimesne meclis-i şer‘-i şerîfde merhûm-ı mezbûrun zevcesi Meleki bt. Ahmed nâm hatun mahzarında takrîr-i da‘vâ edip merhûm-ı mezbûrun cümle muhallefâtı mezkûr Meleki Hatun kabz etdikden sonra hâlâ ba‘zı eşyâsın ihtifâ edip defter olunmayıp benim için zabta almamıştır benim makbûzum olan eşyâmdan mâ‘adâ mezkûre Meleki Hatun inkârıyla cevâb vermeğin müdde‘î-i mezkûrdan beyyine taleb olundukda beyyineden âciz olup mezkûre Meleki Hatun’a yemîn teklif etmeğin mezkûre Meleki Hatun merhûm-ı mezbûrun muhallefâtından kendi zimmetinde ism-i mâl ıtlâk olunur nesne kalmadığına ve kimseden saklamadığına yemîn billâhî te‘âlâ eyledikden sonra mezkûr Mehmed Bey da‘vâdan men‘ olunup vâki‘ hâl bi’t-taleb kayd olundu. Cerâ zâlike ve hurrire fî-evâili Cemâziyelevvel li-sene elf. Şühûdü’l-hâl: Mehmed b. Ramazan, Şaban b. Hızır el-imâm, Ali b. Hüseyin el-müezzin, Mustafa b. Hüseyin, Ahmed b. Abdullah, Musa Bey b. Abdullah.