İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 98 Hüküm no: 54 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun ve Nesli Hatun’un babalarından kalan evdeki hisselerini kardeşi Hatice’ye sattıkları Sebeb-i tahrîr-i hurûf oldur ki, Mahrûse-i Kostantıniyye’de Muhtesib Karagöz mahallesinde vefât eden merhûm Mustafa Çelebi b. İbrahim nâm kimesnenin sulbiye kızı Âişe tarafından husûs-ı âti’z-zikri ikrâra hasm-ı şer‘î mahzarında Mustafa Çavuş b. İdris ve İskender Bey b. Bâli nâm kimesneler şehâdetleri ile vekâleti sâbite olan zevci Derviş b. Mehmed nâm kimesne ve merhûm-ı mezbûrun diğer sulbiyesi Nesli Hatun husûs-ı âti’z-zikri ikrâra hasm-ı şer‘î mahzarında Mehmed Çelebi bin ( ) ve İskender nâm [kimesneler] şehâdetleri ile vekâleti sâbite olan Piyale Bey b. Abdullah nâm kimesne meclis-i şer‘-i kavîmde merhûm-ı mezbûrun diğer sulbiyesi Hatice Hatun tarafından husûs-ı âti’z-zikri tasdîka nehc-i şer‘î üzere vekâleti sâbite olan Ahmed Çelebi b. Haydar muvâcehesinde takrîr-i kelâm edip merhûm-ı mezbûrun muhallefâtından mahrûse-i mezbûrede Hızırbey mahallesinde vâki‘ olup iki beyt-i süflî ve bir beyt-i ulvî ve hânûtu ve iki mahzeni ve iki fırını ve bi’r-i mâ’i ve kenîfi ve muhavvatayı müştemil olup bir cânibi Kerson v. İlya mülküne ve bir cânibi Selma bt. Samarye ve bir cânibi Hoca Sinan Vakfı’na ve bir cânibi tarîk-i âmma müntehî olan mülk menzil merhûm-ı mezbûrun vefâtından verâseti kızları <> müvekkiletân-ı mezbûretân Âişe[‘ye] ve Nesli’ye ve mezbûre Hadice’ye ve sagīre Rahime’ye ve zevci [zevcesi] Âişe’ye münhasıra olup zevci [zevcesi] mezbûr[e] Âişe’ye tehârüc-i şer‘î tarîkiyle ihrâc olundukda zikr olunan menzil-i merkūmun benât-ı erba‘ası mâ-beynlerinde kalmağın hâlâ müvekkilelerimiz mezbûrtân Âişe’ye ve Nesli’ye menzil-i mezbûrun hisse-i şâyi‘a-i mu‘ayyene ki her birinin rub‘ hissedir mezkûre Hadice’ye kırk ikişer bin beşer yüz akçeye bey‘ edip her biri meblağ-ı mezbûr kırk iki bin beş yüz akçeyi mezbûre Hadice’den alıp kabz eylediler bi-vechin mine’l-vücûh menzil-i mezkûrda aslâ alâkaları kalmamışdır deyü mezbûrân Derviş Çavuş ve Piyale Bey ikrâr ve i‘tirâf eylediklerinde mukırrân-ı mezbûrânın ikrâr-ı meşrûhlarını mezkûr Ahmed Çelebi bi’l-muvâcehe tasdîk ekdikde vâki‘ hâl bi’t-taleb kayd olundu ki vakt-i hâcetde kâşif mâ-cerâ ola. Tahrîren fî-evâili Recebi’l-mürecceb min-şühûri sene elf. Şühûdü’l-hâl: Mustafa b. Abdullah, Hüseyin b. Abdullah, Pervâne b. Abdullah, Mehmed b. Mahmud, Rıdvan [b.] Abdullah, Ali b. Abdullah.