Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 485 Hüküm no: 577 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sirkeci oğlu Serkis’in Sahak’ta olan alacağını ispat edemediği Mahmiye-i İstanbul’da Şehzâde Cami‘-i şerîfi kurbunda sâkin tüccârdan Sirkeci oğlu Serkis nâm Ermeni meclis-i şer‘-i şerîf-i enverde işbu bâ‘isü’l-vesîka Serabiyon nâm Ermeni muvâcehesinde üzerine da‘vâ ve takrîr-i kelâm edip mezbûr Serabiyon’un karındaşı gāib ani’l-meclis Sahak nâm Ermeni zimmetinde yedimden müşterâ ve makbûz beynimizde ilm-i şer‘î ile ma‘lûm acem metâ‘ı semeninden on bin akçe hakkım olup meblağ-ı mezbûra mezkûr Serabiyon emr ve kabûlü hâviye kefâlet-i sahîha-i şer‘iyye ile kefîl oldukdan sonra meblağ-ı mezbûru kable’l-edâ mezkûr Sahak gaybet etmeğin suâl olunup meblağ-ı mezbûr bi hasebi’l-kefâle mezkûr Serabiyon’dan alıverilmek matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz edip tahlîfe dahi tâlib olmamağın mûcebiyle müdde‘î-i mezkûra bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fî evâhiri Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. İdris, Mustafa b. ( ), Ahmed b. Mehmed ve gayruhüm mine’l-hâzırîn.