Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 486 Hüküm no: 578 Orijinal metin no: [97b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Efendi b. Cafer’in Yako v. Murdehay’da alacağı olduğu Mahrûse-i Galata müzâfâtından Beşiktaş kasabasına tâbi‘ Ortaköy’de sâkin iken bundan akdem hâlik olan Yako v. Murdehay nâm yahudinin verâseti zevce-i metrûkesi Simoyla bt. Yasef ile evlâd-ı sıgārı Yahuda ve Yasef ve Murdehay ve Radye ve Arhondabula ve Rine ve Meyram ve Bafa’ya münhasıra olduğu şer‘an zâhir ve müte‘ayyin oldukdan sonra Haleb tüccârından olup mahmiye-i İstanbul’da Balatkapısı kurbunda sâkin işbu bâ‘isü’l-kitâb Derviş Efendi b. Cafer meclis-i şer‘-i şerîf-i enverde hâlik-i mezbûrun terekesini kabz ve düyûn-ı müsbetesini edâya ve sıgār-ı mezbûrun tesviye-i emirleriyçün kıbel-i şer‘den mansûb vasîleri olmağla tereke-i kāsıra-i hâlik-i mezbûra vâzı‘ü’l-yed olan Rafayel v. Da[vid], Perile? v. Simoyla muvâcehelerinde üzerlerine da‘vâ ve takrîr-i kelâm edip târih-i kitâbdan on altı ay mukaddem işbu yedimde olan deyn temessükü nâtık olduğu üzre hâlik-i mezbûr hâl-i hayâtında bin esedî guruş ikrâz ve teslîm altmış zirâ‘ sandal [98a] kumaşımı dahi altmış esedî guruşa bey‘ ve teslîm ol dahi iştirâ ve kabûl eyledikden sonra meblağayn-i mezbûreyn cem‘an bin altmış guruşumu kable’l-edâ mezbûr Mako hâlik olmağın suâl olunup terekesinden alıverilmek matlûbumdur [dedikde] gıbbe’s-suâl mezbûrân cevâblarında tereke-i kāsıra-i hâlik-i mezbûr[a] vaz‘-ı yedlerini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda Unkapanı’nda sâkin Sinyora cemâ‘atinden Mako v. Salamon ve Vâlide hanında sâkin Yaso v. Avraham nâm yahudiler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Derviş Efendi târih-i kitâbdan on altı ay mukaddem hâlik-i mezbûr Yako v. Yahuda v. Murdehay nâm yahudiye hâl-i hayâtında bin esedî guruş ikrâz ve iştirâ ve kabûl ve kabz edip yedinde deyn-i mezbûru nâtık temessük dahi vermişdi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’s-suâl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî selhi Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Ağa b. Mahmud, el-Hâc Şâhin b. Abdullah, Ebûbekir b. Mehmed, Mehmed b. Muharrem, Ali b. Bâli.