İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 118 Hüküm no: 75 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un mehr-i müeccelinin bir kısmını kocası Yusuf’a hibe ettiği eş-Şeyh Muhyiddin mahallesinde vefât eden Hadice Hatun bt. Mehmed’in sagīre-i sulbiyesi Safiye’ye kıbel-i şer‘den mansûb vasî olan Yusuf Çavuş b. Hüdaverdi ve müteveffât-ı mezbûrenin li-eb kız karındaşları ve vâriseleri olan Fatıma ve Râziye taraflarından vekîl-i şer‘î olan Ahmed Çavuş b. Mustafa mahfil-i kazâda müteveffât-ı mezbûrenin zevci olan Yusuf Çavuş b. Abdullah mahzarında bi’l-vekâle ve’l-vesâye takrîr-i da‘vâ edip müteveffât-ı mezbûre Hatice’nin mezkûr Yusuf Çavuş zimmetinde olan on beş bin akçe mehr-i müecceli dahi muhallefâtına dâhil olup verese-i mezbûre beyninde alâ-mâ farazallâhu te‘âlâ taksîm olunmasın taleb ederiz dediklerinde gıbbe’s-suâl mezbûr Yusuf Çavuş cevâb verip fi’l-vâki‘ mezkûrenin mehr-i müecceli on beş bin akçe üzerine akd olundu lâkin mezkûre Hadice hâl-i hayatında ve kemâl-i akl ve sıhhatinde meblağ-ı mezbûrdan dört bin akçesin bana hibe ve zimmetimi ibrâ edip ben dahi ittihâb ve kabûl etdim bâkī zimmetimde on bir bin akçe kaldı deyü gıbbe’l-inkâr ve’l-istişhâd udûl-i Müslimînden mahalle-i mezkûreden Mehmed b. Ahmed ve Hamza Subaşı b. Abdullah mahfil-i kazâya li-ecli’ş-şehâde hâzırân olup istişhâd olundukda fi’l-hakīka mezkûre Hadice bt. Mehmed hâl-i hayat ve kemâl-i akl ve sıhhatinde on beş bin akçe mehr-i müeccelinden dört bin akçesin zevci mezkûr Yusuf Çavuş’a hibe eyledi mezbûr dahi meclis-i hibede ittihâb ve kabûl eyledi bu husûsa şâhidleriz deyü şehâdet-i şer‘iye etdiklerinde gıbbe’t-ta‘dîl mûcebiyle hüküm olunup mâ-vaka‘a bi’t-taleb sebt-şüd. Fî-evâhiri Zilhicce li-sene hamse ve elf. Şühûdü’l-hâl: Mustafa Bey, Hızır Subaşı, Memi Efendi [b.] Abdurrahman el-imâm, Süleyman Çavuş, İbrahim, Mehmed b. Ramazan ve gayruhum.