İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 127 Hüküm no: 89 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Rıdvan’ın babasının muhallefatından olan alacağını vasisinden aldığı Mahrûse-i İstanbul’da Süleymanağa mahallesinde vefât eden Rıdvan Bey b. Mehmed’in sinni bulûğuna mütehammil olduğu hâlde bulûğuna mu‘terif olan oğlu Mustafa nâm emred-i bâliğ meclis-i şer‘de mezbûr Mustafa’nın kıbel-i şer‘den mansûb vasîsi olan hâssa kürkçülerden fahrü’l-a‘yân Mahmud Bey b. Abdülmennan mahzarında takrîr-i merâm edip babam müteveffâ-yı merkūm Rıdvan Bey b. Mehmed’in cümle muhallefâtından mahrûse-i mezkûrede Çadırcı Ahmed mahallesinde vâki‘ olup lede’l-cîrân ma‘lûmü’l-hudûd ve’l-müştemilât mülk menzilinden gayrı muhallefâtından kassâm-ı askerî defteri mûcebince on altı bin beş yüz akçe hakk-ı mevrûsumu vasîm olan mezbûr Mahmud Bey kabz ve zabt etmiş idi el-hâletü hâzihî meblağ-ı merkūmu on altı bin beş yüz akçe hakk-ı mevrûsumu vasîyy-i merkūm Mahmud Bey yedinden işbu meclis-i şer‘de hâzıra vâlidem Fahrünnisa Hatun bt. Mustafa ma‘rifeti ile bi’t-tamam ve’l-kemâl alıp kabz ve tesellüm eyledim. Meblağ-ı merkūmdan mezbûr Mahmud Bey’de bir akçe ve bir habbem kalmadı deyü ikrâr-ı tav‘ etdikde mâ-vaka‘a gıbbe’t-tasdîk ve’t-taleb ketb olundu. Tahrîren fî 27 Muharremi’l-harâm sene sitte ve elf. Şühûdü’l-hâl: Mehmed Efendi el-kâtibü’s-sultânî, Murad b. Himmet el-imâm, Hasan b. Ali el-müezzin, Veli Ağa b. Abdullah ez-zevvâku’s-sultânî, Hüsrev b. Abdullah, Yusuf b. Abdullah, Sefer b. İbrahim, Mahmud b. Ali, Mehmed b. Ramazan, Mustafa b. Mahmud.