İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 128 Hüküm no: 90 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun’un Şahhuban Hatun’un vârisesi olduğu Mahrûse-i İstanbul’da beytü’l-mâl-i hâssa bi’l-fi‘il emîn olan Mehmed Çavuş b. Hüseyin meclis-i şer‘-i şerîfde mahrûse-i mezbûrede Kepçeci Pîrî mahallesinde sâkine olan Kamer Hatun bt. Behram Bey mahzarında takrîr-i merâm edip mahalle-i merkūmede bundan akdem vefât eden merhûme Şahhubân Hatun’un zâhirde zevci Ahmed Bey b. Abdullah’dan gayrı vârisi olmamağla muhallefât-ı mevcûdesinin ve mahalle-i merkūmede lede’l-cîrân [ve] ma‘lûmü’l-hudûd mülk menzilinin nısfı beytü’l-mâl-i mezkûr için kabz ve zabt olunmalı iken mezbûre Kamer Hatun nısf-ı mezkûre bi-gayrı vech-i şer‘î vaz‘-ı yed etmişdir yedi izâle olunup beytü’l-mâl-i mezbûr için zabt olunmasın taleb ederin suâl olunsun dedikde gıbbe’s-suâl mezbûre Kamer Hatun cevâb verip ben müteveffât-ı mezbûre Şahhubân Hatun’un zât-ı rahm ve vârisesi olmağile nısf-ı mezkûre vaz‘-ı yed etdim şol cihetden ki babam mezbûr Behram Bey ile müteveffât-ı mezbûre Şahhubân Hatun li-ebeveyn karındaşlardır. Babaları Yakov nâm zimmî Efrenci’dir ve anaları Hurşid Hatun’dur. Müteveffât-ı merkūmede Şahhubân Hatun’un verâseti bana ve zevci Ahmed Bey’e münhasıradır deyicek emîn-i merkūm mezbûre Kamer Hatun’un vech-i meşrûh üzere verâsetin inkâr etmeğin mezbûre Kamer Hatun’un sıdk-ı makāline beyyine taleb olundukda mahrûse-i mezbûrede merkūm Mihrimah Sultan Câmi‘i’nde imâm olan Mevlana Mahmud b. Halil ve mahalle-i merkūmede müezzin olan Mevlana Mahmud b. İsmail ve Mehmed b. Ahmed ve Abdüzzahir b. Kiçi Bey meclis-i şer‘-i şerîfde li-ecli’ş-şehâde hâzırûn olup fi’l-hakīka müdde‘iye-i müzbûre Kamer Hatun müteveffât-ı mezbûre Şahhubân Hatun’un zât-ı rahm ve vârisesidir şu cihetden ki mezbûre Kamer Hatun mesfûr Behram Bey’in bint-i sulbiyesidir ve mezbûr Behram Bey ile müteveffât-ı mezbûre Şahhubân Hatun li-ebeveyn karındaşlardır. Babaları Yakov nâm zimmî Efrenci’dir. Anaları Hurşid Hatun’dur. Müteveffât-ı mezbûrenin verâseti müdde‘iye-i mezbûre Kamer Hatun’a ve zevci Ahmed Bey’e münhasıradır bu ikisinden gayrı vârisi ve muhallefâta müstahak bilmeyiz ber-vech-i meşrûh üzere verâsetine biz şâhidleriz şehâdet-i şer‘iye dahi ederiz deyü edâ-i şehâdet-i şer‘iye etdiklerinde şehâdetleri gıbbe’t-tezkiye ve’t-ta‘dîl makbûle olup mûcebiyle hüküm olundukda mâ-vaka‘a gıbbe’t-taleb ketb olundu. Tahrîren fî 17 Safer li-sene sitte ve elf. Şühûdü’l-hâl: Mehmed b. Mahmud, Cafer b. Ali, Mustafa b. Abdullah, Ahmed b. Hüdaverdi, Mehmed b. Ramazan, Mustafa b. Mahmud ve gayruhum.