İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 129 Hüküm no: 91 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun’un Şahhuban Hatun’un muhallefatından dolayı hissesini Ahmed Bey’e sattığı Mahrûse-i İstanbul’da Keçeci Pîrî mahallesinde bundan esbak müteveffât olan merkūme Şahhubân Hatun bt. Abdullah’ın verâseti zevci Ahmed Bey b. Abdullah’a ve li-ebeveyn karındaşı merkūm Behram Bey nâm Gürci’nin bint-i sulbiyesi Kamer Hatun’a münhasıra olup mezbûre Kamer Hatun tarafından husûs-ı âtîye vekîl olan hasm-ı şer‘î mahzarında ale’n-nehc-i şer‘î Mevlana Mahmud b. İsmail el-müezzin ve Mevlana Yusuf b. Aydın el-imâm şehâdetleri ile vekâleti sâbite olan Abdüzzahir b. Kiçi Bey meclis-i şer‘-i şerîfde mûmâ-ileyh Ahmed Bey mahzarında takrîr-i merâm edip müvekkilem mezbûre Kamer Hatun ile mesfûr Ahmed Bey mâ-beynlerinde ilm-i şer‘î ile ma‘lûme mevrûseleri müteveffât-ı mezbûre Şahhubân Hatun’un esbâbının ve mahalle-i mezbûrda lede’l-cîrân ma‘lûmü’l-hudûd ve’l-müştemilât menzilin nısfı zevci mezbûr Ahmed Bey’in hakk-ı mevrûsu ve nısf-ı âharı müvekkilem mezbûre Kamer Hatun’un hakk-ı mevrûsu idi. El-hâletü hâzihî müvekkilem mezbûre Kamer Hatun esbâb-ı ma‘lûme-i mezbûreden ve menzil-i merkūmdan nısf hisse-i mevrûsesini tehârüc vechi üzere tarafından rızâ ile beş bin nakd akçeye mezbûr Ahmed Bey ile musâlaha edip meblağ-ı mezbûr beş bin akçeyi meclis-i sulhda mesfûr Ahmed Bey yedinden bi’t-tamam ve’l-kemâl kabz ve tesellüm eyledi ve min-ba‘d esbâb-ı ma‘lûme-i mezkûrede ve menzil-i mezbûrede bi-vechin mine’l-vücûh-i şer‘iye medhal ve alâkam kalmadı mezbûr Ahmed Bey’in mülk-i mahzıdır ve bi’l-cümle husûs-ı irse müte‘allik de‘âvî ve muhâsamâtdan ibrâ-i âm ile ibrâ-i zimmet etdim min-ba‘d bu husûsa müte‘allik benden bi’l-asâle ve’l-vekâle da‘vâ sudûr ederse lede’l-hükkâm mesmû‘a olmaya deyü tasarrufât-ı şer‘iyeyi nâfize olduğu hâlde müvekkilem mezbûre Kamer Hatun ikrâr-ı tav‘î etdi dedikde Mesfûr Ahmed Bey vekîl-i mesfûr Abdüzzahir’i kelimât-ı meşrûhasında vicâhen tasdîk edicek mâ-vaka‘a gıbbe’t-taleb kayd olundu. Tahrîren fî 23 Safer li-sene sitte ve elf. Şühûdü’l-hâl: Mahmud b. Halil el-imâm, Yusuf b. Abdullah el-imâm, Yusuf b. İdris, Mustafa b. Abdullah, Osman b. Abdullah, Mansur b. Abdullah, Mustafa b. Mehmed, İbrahim b. Abdullah, Hasan b. Abdullah, Rüstem b. Abdullah ve gayruhum.