İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 130 Hüküm no: 92 Orijinal metin no: [21a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal tarafından zabtedilen evin müzayede ile Abdünnebi Çavuş’a satıldığı Mahmiye-i Kostantıniyye mahallâtından Sarrâc İshak mahallesinde bundan akden vefât eden merhûme Saliha Hatun bt. Abdi’nin muhalefâtına zâhirde vâris-i ma‘rûfu olmadığı ecilden emânet-i âti’l-beyânı hasebiyle vâzı‘-ı yed olan mahmiye-i mezbûrede vâki‘ Beytü’l-mâl-i hâs emîni Mehmed Çavuş b. Hüseyin meclis-i şer‘a hâzır olup müteveffât-ı mezbûrenin muhallefâtından olup mahalle-i mezbûrede kâin, fevkānî iki, tahtânî bir hâneyi, sofayı, bi’r-i mâı ve muhavvatayı müştemil, hudûdu bir tarafından merhûm Sultan Bâyezid Han vakfı, bir tarafından Osman Çelebi mülkü, bir tarafından İbrahim Bey mülkü, bir tarafından da tarîk-ı âm ile mahdûd olan cemî‘ menzili cümle hudûdu ve kâffe-i hukūkuyla râyicü’l-vakt yirmi dokuz bin yüz akçe semen-i mu‘ayyen-i makbûzla bâ‘is-i tahrîr-i hâze’l-kitâb fahrü’l-cüyûş Abdünnebi Çavuş b. Ahmed eş-şehîr bi-Kemânî nâm kimseye emânet-i mahkiyesi hasebiyle bey‘-i bâtt-ı sahîh-i şer‘î ile bey‘ ettiğini ikrâr ve i‘tirâf eyledi. Müşterî-yi mezbûr dahi kendi mâlıyla ve kendisi için iştirâ etti. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Abdünnebi Çavuş üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fî-selhi Saferi’l-muzaffer li-sene sitte ve elf. Şühûdü’l-hâl: Mustafa b. Mahmud ve Mehmed b. Ramazan ve Mehmed b. Hamza ve Ferhad b. Abdullah, Hüsrev b. Mecdullah? ve Ali Halîfe el-müezzin ve Sinan Bey b. Abdullah ve Mehmed b. Abdullah el-Hılvânî ve Mehmed b. Abdullah ve Mahmud b. Abdullah ve gayruhum