İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 130 Hüküm no: 93 Orijinal metin no: [21a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Bey b. Abdullah’ın muhallefatındaki evin mirasçıları tarafından satıldığı Mahmiye-i Kostantıniyye mahallâtından Kızıltaş mahallesinde bundan akdem vefât eden bevvâb-ı sultânî merhûm Yusuf Bey b. Abdullah’ın ana-baba bir er karındaşı ve vârisi İbrahim b. Mahmud nâm sagīre kıbel-i şer‘-i şerîfden mansûb vasî olan Davud b. Abdullah nâm kimse ve müteveffâ-i mezkûrun ana-baba bir er karındaşı kızı ve vârisi Hadice bt. Mahmud nâm sagīreye kıbel-i şer‘-i mergūbdan mansûbe vasî olan Zamane Hatun bt. Abdullah ve müteveffâ-yı mezbûrun vesâyâsını tenfîze vasîyy-i muhtâr olan zevcesi ve vârisi Hasna Hatun bt. Abdullah nâm hatun meclis-i şer‘-i şerîfe hâzırûn olup şöyle ikrâr ve i‘tirâf ettiler ki, müteveffâ-yı mezkûrun muhallefâtından olup mahalle-i mezbûrede kâin, tahtânî kebîr bir hâneyi, bi’r-i mâı ve muhavvatayı müştemil, hudûdu bir tarafından müşterî-yi mezbûr mülkü, bir tarafından Ayas Bey b. Abdullah mülkü, bir tarafından Mahmud Çavuş b. Abdullah mülkü, bir tarafından Lüleci Mehmed Bey mülkü ile mahdûd olan cemî‘ menzili cümle tevâbi‘i ve levâhıkı ve kâffe-i menâfi‘i ve merâfıkıyla râyicü’l-vakt on beş bin akçe semen-i mu‘ayyen-i makbûzla bâ‘is-i tahrîr-i hâze’l-kitâb bevvâb-ı sultânî Mustafa Bey b. Yusuf nâm kimseye vesâyet ve verâset-i mahkiyeleri hasebiyle bey‘-i bâtt-ı sahîh-i şer‘î ile bey‘ ettiklerini ikrâr ve i‘tirâf eylediler. Müşterî-yi mezbûr dahi kendi mâlıyla ve kendisi için iştirâ etti. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun zarûret-i nafaka ve zarûret-i kısmet ve sülüs sebebiyle mebî‘-i mezkûrun müşterî-yi mûmâ-ileyhe arz edilmesinden sonra vâki‘ oldu. Vaka‘a’t-tahrîr fî-evâhiri Saferi’l-muzaffer li-sene sitte ve elf. Şühûdü’l-hâl: Kıdvetü emîrü’l-ümerâi’l-kirâm Mehmed Bey b. Abdüsselam ve Mehmed Ağa b. Ahmed el-müteferrika ve Ali b. Ramazan el-imâm ve Ömer Bey b. Abdullah ve Müstedam Bey b. Abdullah