İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 131 Hüküm no: 94 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hani Hatun’un vâris olmadığından evinin Hamza Bey’e satıldığı Mahrûse-i İstanbul’da beytü’l-mâl-i hâssa emîni olan fahrü’l-akrân Mehmed Çavuş b. Hüseyin meclis-i şer‘-i şerîfde işbu bâ‘isü’l-kitâb fahrü’l-akrân Hamza Bey b. Abdullah nâm korucu mahzarında takrîr-i merâm edip mahrûse-i mezbûrede Pirinççimescidi mahallesinde bundan esbak vefât edip zâhirde verâset-i ma‘rûfu olmamağla muhallefâtı üç odalı ve bir ocaklı sofalı ve diğer sofalı ve bi’r-i mâi ve kenîfi ve muhavvatayı müştemil olup beytü’l-mâl-i mezbûre zabt olunan merhûme Hânî Hatun bt. Mustafa’nın cümle muhallefâtından mahalle-i mezbûrede vâki‘ olup bir tarafı Hasan Çelebi b. Musa mülküne ve bir tarafı el-Hâc Cafer’e ve bir tarafı el-Hâc Cafer b. Abdullah mülkü ile ve bir tarafı Hasan Bey mülki ile ve tarîk-i âm ile ve Hasan mülkü ile mahdûd ve mümtâz olan mülk menzil beytü’l-mâl-i mezbûr tarafından Mustafa Efendi nâm kādıya yirmi dört bin akçeye bey‘ olundu hâlâ <> menzil-i merkūma gabn ile bey‘ olduğu zâhir olup ziyâde bahâ ile menzil-i merkūma râgıb kimesne olup [olmayıp] geri âhara ziyâde ile bey‘i fermân olmağın geri Sûk-ı sultânîde mecâlis-i tâlibîne arz olundukda bi’l-müzâyede kıymeti otuz bin akçede mezbûr Hamza Bey’in üzerinde menzil-i mezbûr karâr edip ziyâde ile rağbet eder kimse olmamağın menzil-i mezbûru bi-cümleti’t-tevâbi‘ ve’l-levâhık mûmâ-ileyh Hamza Bey’e otuz bin akçeye îcâb ve kabûlü hâvî bey‘-i bâtt-ı şer‘î ile bey‘ ve teslîm edip meblağ-ı merkūm otuz bin akçeyi müşterî-i merkūm yedinden beytü’l-mâl [emîni] mersûm yedinden alıp kabz ve tesellüm etdim deyü tâyi‘an ikrâr ve i‘tirâf etdikde kayd olundu. [Tarihi yazılmamıştır.] Şühûdü’l-hâl: el-Hâ[c] Mehmed …? ve Ali Çavuş [b.] Abdullah ve Mustafa Çavuş Kâtibzâde, ve Cafer Çavuş b. Hızır ve Osman Çavuş b. Eyüb, Mahmud b. Abdullah, el-Hâc Pervâne b. Abdullah ve diğer Pervâne [b.] Abdullah ve Ali Çelebi b. Mesih ve Eyüb Efendi (…) ve Mehmed b. el-Hâc Hızır ve Abdi Kethudâ b. (…) ve (…) ve gayruhum.