Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 487 Hüküm no: 580 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İhsan Hatun’un hissesinin Hacı Ali b. Durmuş’un terekesinden tahsili Mahmiye-i İstanbul’da Çerağī Hamza mahallesinde sâkin iken bundan akdem vefât eden el-Hâc Ali b. Durmuş b. Mehmed’in verâseti zevce-i metrûkesi Gülistan bt. Abdullah nâm hâtun ile sulbiye sagīre kızı Ümmügülsüm ve li ebeveyn karındaşı Mustafa ve kız karındaşı İhsan nâm hâtuna münhasıra olduğu şer‘an zâhir ve müte‘ayyin oldukdan sonra mezbûre İhsan Hâtun tarafından husûs-ı âti’l-beyâna ve yedinde mazmûnu müsbit hüccet-i şer‘iyye nâtıka olduğu üzre vekîli olan mezbûre Gülistan Hâtun mahzarında bi’l-vekâle ikrâr ve takrîr-i kelâm edip karındaşım müteveffâ-yı mezbûr el-Hâc Ali’nin terekesinden bi hasebi’l-irsi’ş-şer‘î kız karındaşım müvekkilim mezbûre İhsan’a defter-i kassâm nâtık olduğu üzre bir sehim hissesine isâbet eden otuz iki esedî guruş ile bir zolotayı mezbûre Gülistan Hâtun tereke-i müteveffâ-yı mezbûrdan bana edâ ve teslîm ben dahi mezbûre İhsan için bi’l-vekâle tamâmen ahz u kabz eyledim ba‘de’l-yevm mezbûre İhsan’ın merkūm Gülistan yedinde ve zimmetinde bir akçe [ve] bir habbe hakkı kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin Çelebi b. Mehmed, Ahmed Çelebi b. Hüseyin, Sâlih Efendi b. Mehmed, Mehmed Çelebi b. Mustafa.