Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 488 Hüküm no: 581 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Himmet Beşe b. Süleyman’ın vefatından önce, kölesi Yusuf b. Abdullah’ı azat ettiği Zikri âtî da‘vâya kıbel-i şer‘den ...? olan orta [bo]ylu, açık kaşlı, gök ala gözlü Rûsiyyü’l-asl hâmil-i hâze’l-kitâb Yusuf b. Abdullah meclis-i şer‘-i şerîf-i enverde mevlâsı olup mahmiye-i İstanbul’da Molla Hüsrev mahallesinde sâkine iken bundan [akdem] vefât eden Niğdeli demekle şehîr Himmet Beşe b. Süleyman’ın sagīr oğlu Mustafa [ve] sagīre kızı Ümmühâni’nin tesviye-i umûruna vasiyy-i muhtâr olan Osman Beşe b. Abdullah’ın ber mûceb-i hüccet-i şer‘iyye vekîl-i müsecceli olan Ali Beşe b. Mustafa mahzarında üzerine da‘vâ ve takrîr-i kelâm edip ben müteveffâ-yı mezbûr Himmet Beşe’nin abd-i memlûkü olmağla mezbûr Himmet Beşe târih-i kitâbdan yedi sene mukaddem hâl-i hayâtında ve kemâl-i âfiyetde hâl-i hayâtında beni hasbeten lillâhi’l-ahad malından âzâd edip ben sâir ahrâr-ı asliyyîn gibi hür olmuşiken hâlâ fevt oldukdan, vasiyy-i mezbûr bana rıkk olmak üzre vaz‘-ı yed eder suâl olunup müvekkil-i mezbûr benden kasr-ı yed etmek üzre vekîl-i mezbûr[a] tenbîh ve sebîlim tahliyye olunmak matlûbumdur dedikde gıbbe’s-suâl vekîl-i mezbûr cevâbında fi’l-hakīka müvekkil-i mezbûrun mevsûf-ı mezbûra rık olmak üzre vaz‘-ı yedini ikrâr lâkin mevsûf-ı mezbûrun ber minvâl-i mübeyyen ıtkını inkâr edicek müdde‘î-i mezbûrdan müdde‘âsına beyyine taleb olundukda yine mahalle-i mezbûrede sâkin udûl-i müslimînden Mustafa Çelebi b. Hüseyin ve Osman Beşe b. Oruc nâm kimesneler li ecli’ş-şehâde meclise hâzırûn olup isre’l-istişhâd fi’l-vâki‘ müteveffâ-yı mezbûr Niğdeli demekle şehîr Himmet Beşe b. Süleyman târih-i kitâbdan üç sene mukaddem hâl-i hayâtında [abd-i memlûkü işbu mevsûf-ı mezbûr Yusuf b. Abdullah’ı bizim huzûrumuzda malından tahrîr ve i‘tâk ve sâir ahrâr-ı asliyyîn silkine idrâc ve ilhâk edip mevsûf-ı mezbûr sâir ahrâr-ı asliyyîn gibi hür olmuşdur]. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde müvekkil-i mezbûr mevsûf-ı mezbûrdan kasr-ı yed etmek üzre mezkûr Ali’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve tis‘în [ve elf]. Şuhûdü’l-hâl: Receb Efendi b. ( ), Osman Beşe b. Oruc, Ali Beşe b. ( ), Molla Mustafa b. Şükrullah?, İsmail b. Mustafa, İbrahim b. Ahmed.