İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 170 Hüküm no: 154 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe ve Emine Hatun’un çiftlik hisselerini kardeşleri Mahmud Bey’e sattığı Mahrûse-i İstanbul’da Baklalık nâm mahallede sâkin olup bundan esbak sefer-i sultânîde vefât eden merhûm Behram Çavuş b. Abdullah’ın verâseti zevcesi Kerime Hatun bt. Abdullah ve kebîre sulbiye kızı [Âişe] Hatun’a ve li-ebeveyn karındaşı Mustafa b. Abdullah’a münhasıra olup kable’l-kısme mezbûr Mustafa dahi vefât edip verâseti kebîr oğulları Ali Beşe ve Mehmed ve Mahmud ve Hüseyin Beşe ve kebîre kızı Emine Hatun’a münhasıra olup müteveffâ-yı mezbûr Behram Çavuş b. Abdullah’ın mahalle-i mezbûrede olup füruht olunan menzil ve muhallefâtından ve Haslar kazâsında Sarnıç nâm karyede vâki‘ olup zikri âtî olan yetmiş beş [bin] akçe kıymetli çiftliğinden ve seferde ve ze‘âmetinde olan muhallefâtından cem‘an yedi yüz yirmi iki bin dokuz yüz doksan iki akçe hâsıl olup meblağ-ı mezbûrdan verese-i mezkûrîn ihbârları ile müteveffâ-yı merkūmun mahmiye-i mezbûrede Kadırga limanı kurbünde vâki‘ vakıf mescid-i şerîf meremmâtı için iki yüz bin akçe ifrâz olunup sâir düyûn-ı müteferrikası ve mesârif-i lâzımesi ve umûr-ı mühimme geri verese rızâları ile edâ olundukdan sonra verese beyninde taksîm olunacak üç yüz yirmi dokuz [bin] yüz altmış üç akçe bâkī kalıp meblağ-ı bâkī-i mezbûrdan zevce-i mezbûre Kerime Hatun’un sümün hisse-i şer‘iyesi kırk bin yüz yirmi akçe olup ve kebîre kızı merkūme Âişe’nin nısf hissesi yüz altmış beş bin dört yüz seksen bir akçe olup ve mezkûrûn Ali Beşe’nin ve Mehmed Bey’in ve Mahmud Bey’in ve Hüseyin’in her birinin hisseleri yirmi altışar bin yedi yüz kırk yedişer akçe olup ve mezbûre Emine Hatun’un hissesi on üç bin üç yüz yetmiş üç akçe olup mezbûrtân Kerime Hatun ve Âişe Hatun ve mezbûr Mahmud Bey zikr olunan hisse-i mu‘ayyenelerin muhallefât bahâsından nakden bi’t-tamam aldıkdan sonra kıymet-i mezbûre ile mukavvem olup karye-i mezkûrede vâki‘ iki hücre ve bir matbahı ve bir fırını ve iki bi‘r-i mâi ve hamamı ve iki çatma odayı ve ahırı ve kenîfi ve sığır damını ve iki anbarı ve bağı ve bahçeyi müştemil olup müteveffâ-yı mezbûra intimâ ile şöhretinden müstağniyyün ani’t-tahdîd olan mülk çiftliği içinde olan iki çift su sığırı ve üç çift kara sığırı ve üç kara sığır ineği ve iki düğe ve üç tosunu ile ve üç buzağısıyla ve iki büyük kazganı ve bir sitili ve bir büyük demirini ve iki büyük tenceresi ve cemî‘ âlât-ı zirâ‘at ve esbâb-ı hırâset ve cemî‘ tevâbi‘i ve âmme-i levâhıkı ve mezâri‘i ve merâti‘i [merâfıkı] ile hırvatlarda? olan mezra‘aları ile yedi sehm üzere mûmâ-ileyhim Ali Beşe’nin ve Mehmed Bey’in ve Hüseyin Beşe’nin ve Emine Hatun’un hisselerine düşüp mezbûrûn bakıye hisselerin dahi nakden almışlar idi el-hâletü hâzihî mezkûr Ali Beşe karındaşı mûmâ-ileyh Mahmud Bey mahzarında meclis-i şer‘de takrîr-i kelâm edip zikr olunan çiftlikde yedi sehmden iki sehm hisse-i şâyi‘a-i mevrûsemi karındaşım mezbûr Mahmud Bey bey‘-i bâtt-ı sahîh-i şer‘î ile yirmi bin akçeye bey‘ edip teslîm-i mebî‘ ve kabz-ı semen eyledim ve zikr olunan iki sehm hissem ile tasarruf etdiğim lede’l-ahâli ve’l-cîrân ma‘lûmü’l-hudûd mezâri‘ ve merâti‘de hakk-ı tasarrufumu dahi sâhib-i arz ma‘rifetiyle yine mezbûr Mahmud Bey’e tefvîz etdim deyü ikrâr-ı tav‘î etdikde ve mezbûre Emine Hatun karındaşı mûmâ-ileyh Mahmud Bey mahzarında meclis-i şer‘-i şerîfde ben dahi zikr olunan çiftlikde yedi sehmden bir sehm hisse-i şâyi‘a-i mevrûsemi karındaşım mezbûr Mahmud Bey’e bey‘-i bâtt-ı sahîh-i şer‘î ile on bin akçeye bey‘ edip teslîm-i mebî‘ ve kabz-ı semen eyledim ve zikr olunan bir sehm hissem ile tasarruf etdiğim lede’l-cîrân hudûdu ma‘lûm olan mezâri‘ ve merâti‘de hakk-ı tasarrufumu dahi sâhib-i arz ma‘rifetiyle yine mezbûr Mahmud Bey’e tefvîz etdim deyü i‘tirâf-ı mer‘î etdikde mukırrân-ı mezbûrânı ikrâr-ı meşrûhunda mezbûr Mahmud Bey vicâhen tasdîk ve şifâhen tahkīk etdikden sonra işbu vesîka bi’t-taleb sebt-şüd. Fî-evâhiri Şevvâl li-sene 1005. Şühûdü’l-hâl: Bâli Kethudâ b. ( ), Hamza b. Ali, el-Hâc Pervâne, Ömer Çelebi b. ( ), Hasan b. Nasuh, Bâli Çelebi b. Yunus, Mustafa Efendi [b.] İlyas, Ahmed b. ( ), Mehmed b. ( ), İbrahim b. Halil, Ahmed b. Veli, [32b] Yusuf b. Abdullah, İbrahim Çavuş b. ( ), Hüsam Efendi b. Ömer, Mustafa Subaşı [b.] İbrahim, Hoca Bekir b. Abdullah, Cemaleddin [b.] Ali, İbrahim Efendi [b.] Resul, el-Hâc Turhan b. Abdullah, umdetü’l-a‘yân Behram Ağa b. Abdullah, Mustafa b. Mahmud, Mehmed b. Ramazan ve gayruhum.