Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 492 Hüküm no: 587 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgaki ve Yanaki’nin Abdi Çelebi b. Hasan Dede’nin vârislerine borçlu olduğu Mahmiye-i İstanbul’da Nişancı Cafer mahallesi sükkânından iken bundan akdem hâlik olan bakkal Todori v. Dimo nâm zimmînin verâseti zî-rahm cihetinden li ebeveyn kız karındaşı oğulları Yorgaki [ve Yanaki] v. İlya nâm zimmîlere münhasıra olduğu şer‘an zâhir oldukdan sonra mezbûrân Yorgaki ve Yanaki meclis-i şer‘-i şerîf-i enverde mahmiye-i mezbûrede Harâccı [Kemal]eddin mahallesi sükkânından iken bundan [akdem] vefât eden Abdi Çelebi b. Hasan Dede’nin evlâd-ı sıgārı Abdurrahman ve Hatice ve Fâtıma’nın tesviye-i emirlerine vasiyy-i muhtârları olan Sâliha Hâtun bt. Abdullah tarafından husûs-ı âti’z-zikri tasdîke sâbitü’l-vekâle vekîl olan râfi‘ü hâze’l-kitâb Mehmed Beşe b. Abdullah mahzarında ikrâr ve takrîr-i kelâm edip mûrisim hâlik-i mezbûr Todori hayâtında sıgār-ı mezbûrûn mallarından vasiyy-i mezbûre Sâliha Hâtun yedinden istidâne ve kabz etmekle zimmetinde lâzımü’l-edâ iki yüz esedî guruş deyni olup meblağ-ı mezbûru kable’l-edâ merkūm Todori hâlik olmağla terekesine biz vâzı‘ü’l-yed olup meblağ-ı merkūm iki yüz guruş sıgār-ı mezbûrûna zimmetimizde lâzımü’l-edâ deynim olduğundan mâ‘adâ vasiyy-i mezbûra Sâliha Hâtun sıgār-ı mezbûrûna babaları müteveffâ-yı mezbûrdan müntakil olup mahmiye-i mezbûrede Sinan Ağa mahallesinde vâki‘ bir tarafdan müteveffâ-yı mezbûrun menzili ve iki tarafdan tarîk-i âm ile mahdûd bir bâb bakkal dükkânlarını târih-i kitâb senesi şehri Ramazâni’l-mübâreki’nin gurresinden iki sene tamâmına değin on iki bin dokuz yüz altmış akçeye bize îcâr ve teslîm biz dahi istîcâr ve kabûl eyledikden sonra meblağ-ı mezbûr iki yüz guruş ile ücret-i mezkûrûn her birimiz âharın zimmetine lâzım gelen meblağa emr ve kabûlü hâvî kefâlet-i sahîha-i şer‘iyye ile kefîl olduk dediklerinde gıbbe’t-tasdîki’ş-şer‘î mahalle-i mezbûre sükkânından Nikola v. Todori ve Kiryako v. Vasil ve Mahmud Çelebi b. Hüseyin ve Tanaş v. Nikola ve Panayot v. Yanaki ve İsmatile v. Nani [Yani?] bâlâda zikri mürûr eden iki yüz guruş ile ücret-i mezkûreye emr ve kabûlü hâviye kefâlet-i sahîha ile her biri alâ hıdetin kefîl olmağın mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Mehmed, Mehmed Çelebi b. İdris, Receb b. Osman, Mehmed b. Ahmed.