Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 494 Hüküm no: 589 Orijinal metin no: [100b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Danik v. Rosik ile ortakları Ovanes ve Necabed v. Haçuk’un birbirlerinin zimmetlerini ibrâ ettiği Mahmiye-i İstanbul’da Mercan Ağa mahallesinde sâkin Danik v. Rosik nâm Ermeni meclis-i şer‘-i şerîf-i enverde kendi tarafından asîl ve li ebeveyn karındaşı Ovanes nâm Ermeni tarafından husûs-ı âti’z-zikre sâbitü’l-vekâle vekîl olan Necabed v. Haçuk nâm Ermeni muvâcehesinde ikrâr ve takrîr-i kelâm edip bundan akdem mezbûrân Necabed ve Ovanes ile beynimizde nice ahz u i‘tâ ve mu‘âmelât-ı şettâ vâki‘ olup el-hâletü hâzihî beynimizde hesâb gördükde her birimiz âharın zimmetinde zuhûr eden hakkını ahz u istîfâ edip husûs-ı mezbûra târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik min ba‘d târih-i kitâba gelince birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. Ömer, Hüseyin Çelebi b. Mehmed, Hasan b. Mehmed.