Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 494 Hüküm no: 590 Orijinal metin no: [100b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ömer ve Ahmed b. Musa’nın kefalet sebebiyle Yakim v. Avraham’da alacakları olduğu Mahmiye-i İstanbul’da Hacı Hasan mahallesinde sâkin bakkal tâifesinden bâ‘isü hâze’l-kitâb Mustafa Çelebi b. Ömer ve Ahmed b. Musa nâm şerîkler meclis-i şer‘-i şerîf-i enverde ve mahfil-i dîn-i münîf-i ezherde tâife-i yahudun Misine cemâ‘atinden Yakim v. Avraham nâm yahudi muvâcehesinde üzerine da‘vâ ve takrîr-i kelâm edip gāib ani’l-meclis Kayon v. Mosi nâm yahudi zimmetinde yedimden iştiraâ ve kabz eylediği beynimizde ma‘lûm bakkal metâ‘ı semeninden dört bin üç yüz yirmi akçe hakkım[a] mezbûr Yakim tarafından emr ve kabûlü hâviye kefâlet-i sahîha-i şer‘iyye ile kefîl olmuşdur hâlâ suâl olunup kefâletine binâen meblağ-ı mezbûrun alıverilmesi matlûbumdur dedikde gıbbe’s-suâl mezbûr Yakim cevâbında meblağ-ı mezbûr dört bin üç yüz yirmi akçeye kefîl olduğunu ikrâr etmeğin mûcebince meblağ-ı mezbûr dört bin üç yüz yirmi akçeyi kefâletine binâen müdde‘î-i mezbûr[a] edâ ve teslîme mezbûr Yakim’e tenbîh olunup mâ vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Ali b. Bâli, Ebûbekir b. Hüseyin, İsmail b. Mustafa.