Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 495 Hüküm no: 591 Orijinal metin no: [100b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdullah Çelebi b. Hüseyin’in Hasan b. Abdullah’ın terekesinden aldığı mallar hususunda Şaban b. Abdullah ile sulh olduğu Medîne-i Halebü’ş-şehbâ ahâlîsinden olup mahmiye-i İstanbul’da Küçük Karaman sûkunda berber olan Şaban b. Abdullah nâm kimesnenin dükkânında sâkin iken bundan akdem vefât eden Hasan b. Abdullah nâm kimesnenin usûbet-i nesebiyyet cihetinden hasren vârisi olan es-Seyyid Abdullah Çelebi b. Hüseyin meclis-i şer‘-i şerîf-i enverde bâ‘isü hâze’l-kitâb mezbûr Şaban mahzarında ikrâr ve takrîr-i kelâm edip mezbûr Hasan’ın hîn-i vefâtında yanında bulunmağla terekesinden on guruş kıymetli bir sîm kılıç ve bir alaca ve bir mâî çuka bi gayri hakkın ahz u kabz eylemişsin deyû bundan akdem taleb ve da‘vâ eylediğimde ol dahi cevâbında ancak mârrü’z-zikr kılıcı ikrâr mâ‘adâyı inkâr ve kılıç-ı mezkûru dahi âhara bey‘ ile istihlâk etmekle beynimizde münâza‘ât-ı kesîre vukû‘undan sonra muslihûn tavassut edip da‘vâ-yı mezkûrumdan sekiz buçuk guruşa benimle müsâlaha olup ben dahi sulh-i mezbûru kabûl ve bedel-i sulh olan meblağ-ı mezbûr[u] yedinden tamâmen ahz u kabz eylediğimden sonra müteveffâ-yı mezbûr Hüseyin’in terekesine müte‘allika âmme-i da‘vâdan mezbûr Şaban’ın zimmetini ibrâ [101a] ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hüseyin Reis, Mustafa b. Osman, İbrahim Çelebi [b.] Ahmed, na‘lçacı Mehmed Beşe, berber Hüseyin Çelebi b. ( ).