Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 495 Hüküm no: 592 Orijinal metin no: [101a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ramazan Çelebi b. Hasan’ın vasiyeti yoluyla kurduğu vakıf Mahmiye-i İstanbul’da İskenderpaşa mahallesinde sâkin sarrâc el-Hâc Ramazan Çelebi b. Hasan nâm kimesne meclis-i şer‘-i hatîr-i enverde bâ‘isü hâze’l-kitâb İbrahim Çelebi b. Abdullah mahzarında ikrâr ve takrîr-i kelâm edip bi irâdetillâhi te‘âlâ dâr-ı bekāya irtihâl ve intikāl eylediğimde sülüs-i cemî‘-i malımdan beş yüz esedî guruş ifrâz vakfım olup ve meblağ-ı mezbûr onu on bir buçuk hesâb üzre istirbâh olunup gallesinden yevmî on akçesi mahmiye-i merkūmede Saraçhâne’de vâki‘ mescid-i şerîfde vâ‘iz ve nâsıh olan kimesneye verile ve yedi yüz seksen akçe dahi senede vakf-ı mezbûruma mütevellî olan kimesne ücreti mukābelesinde olup mutasarrıf ola ve yevmî bir buçuk akçesi dahi cihet-i kitâbet olup kitâbet-i merkūme vazîfesiyle ile’l-inkırâz evlâd-ı evlâd-ı evlâdım batnen ba‘dehû batnin ekber ve erşedine meşrût ola [ve] vakf-ı mezbûruma bir kimesne dahi câbî nasb olunup bir akçe vazîfeye mutasarrıf ola ve senede yedi yüz yirmi akçesi dahi Saraçhâne ahâlîsi umûrlarına verile ve tevliyyeti Saraçhâne kethüdâlarına meşrûta ola ve mütevellî senede beş yüz guruşa iki Mushaf-ı şerîf iştirâ edip rûhum için her bir fakīr-i tâlibü’l-ilme vere ve fazla kalan ribh asl-ı vakfıma zam oluna [ve] vakf-ı mezbûr[a] ile’l-inkırâz evlâd ve evlâdım ve ahâlî-i Saraçhâne hasbî nâzırlar olup senede mütevellînin muhâsebesini itmâm üzre göreler ve yine sülüs malımdan elli guruş techîz ve tekfîn ve levâzım-ı defin için sarf olunup otuz guruş dahi iskāt-ı salâta ve keffâret-i savm ve bi devr-i …? ibâd için fukarâya verile ve vasîm mezbûr İbrahim Çelebi’ye yirmi guruş verile deyû vasiyyet edip vesâyâ-yı merkūmemi ta‘yîn eylediğim minvâl üzre tenfîze mezbûr İbrahim Çelebi’yi vasiyy-i muhtâr nasb [ve] ta‘yîn eyledim dedikde ol dahi vesâyet-i mezkûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Solak Mustafa Çelebi Kethüdâ-yı Saraçhâne, Abdurrahman el-Hâc ( ), sipâhi Mustafa Çelebi, Ali Beşe b. Abdullah.