İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 220 Hüküm no: 225 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menahim v. Benyamin’in müteveffa Mahmud Kethuda’ya rehin olarak verdiği istefanın iade edildiği Alaman cemâ‘atinden Menahim v. Benyamin nâm Yahûdî’nin sulbî oğlu ve husûs-ı âti’z-zikre babası mezbûr Menahim tarafından vekîl-i şer‘îsi olup vekâleti Mahmud Bey b. İbrahim ve Mustafa b. Mahmud nâm kimesneler şehâdetiyle sâbite olan İlya v. Menahim nâm Yahûdî mahfil-i kazâda bundan akdem müteveffâ olan merhûm Mahmud Kethudâ b. Abdullah’ın sagīr-i sulbîsi Mehmed’in tesviye-i umûrı’çün vasîyy-i muhtârı olan fahrü’l-cüyûş Gazanfer Çavuş b. Abdülmennan muvâcehesinde bi’l-vekâle takrîr-i kelâm edip babam mezbûr Menahim’in zimmetinde sagīr-i mezbûr mâlından çuha bahâsından yirmi yedi bin akçe olup meblağ-ı mezbûr mukābelesinde işbu meclis-i şer‘e vasîyy-i mezbûrun ihzâr eylediği elmas ve yâkut ve inci ile murassa‘ ve kırk bin akçe ile mukavvem bir istefanı müteveffâ-yı merkūm Mahmud Kethudâ’ya rehin vaz‘ eylemiş idi. El-hâletü hâzihî meblağ-ı mezbûru vasîyy-i merkūma bi’l-vekâle teslîm eyledim lâkin rehn-i merkūmu bana teslîmden imtinâ‘ eder keyfiyet-i hâl vasîyy-i mezbûrdan suâl olunsun dedikde gıbbe’s-suâl mezbûr Gazanfer Çavuş fi’l-hakīka meblağ-ı mezbûr yirmi yedi bin akçeyi vekîl-i mezbûr İlya yedinden kabz eyledim lâkin zikr olan istefan bi-aynihî müvekkil-i mezbûrun müteveffâ-yı merkūmun yedinde rehin vaz‘ eylediği istefan idiğini bilmezim deyü meblağ-ı mezbûrun kabzına mutasarrıf olup lâkin zikr olan istefan[nın] müvekkil-i mezbûrun olduğunu bilmezim deyü inkâr ile cevâb vermeğin vekîl-i müdde‘î-i merkūmdan da‘vâsına mutâbık beyyine taleb olundukda ahrâr-ı Müslimînden Rıdvan Bey b. Abdullah ve Ali Bey b. Sevindik nâm cündîler meclis-i şer‘-i güzîne li-ecli edâi’ş-şehâde hâzırân olup akībe’l-istişhâd fi’l-hakīka vasîyy-i merkūmun işbu mahalle ihzâr eylediği istefan bi-aynihî müvekkil-i merkūm Menahim’in meblağ-ı merkūm mukābelesinde merhûm-ı merkūm Mahmud Kethudâ’nın rehin vaz‘ eylediği istefandır biz bu husûsa şâhidleriz şehâdet dahi ederiz deyü edâ-i şehâdet-i şer‘iye eylediklerinde ba‘de ri‘âyeti şerâiti’l-kabûl şehâdetleri makbûle olup zikr olan istefanı vekîl-i merkūma teslîme bi’l-muvâcehe tenbîh olundukdan sonra vasîyy-i merkūm yine ol meclisde zikr olan istefanı vekîl-i mezbûra teslîm edip ol dahi kabz ve tesellüm eyledikde vâki‘ hâl bi’t-taleb kayd olundu. Tahrîren fi’l-yevmi’l-hâmis min-Zilka‘de li-sene hamse ve elf. Şühûdü’l-hâl: Ahmed Efendi, Hasan Çelebi, Yusuf Çelebi, Mehmed b. Ramazan, Mustafa b. Mahmud ve gayruhum.