İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 240 Hüküm no: 240 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in Hacı Ömerli köyündeki çiftliğinin Mehmed Çavuş’a satıldığı (…) tahrîr-i hurûf oldur ki, Mahrûse-i İstanbul’da merhûm Davud Paşa Câmi‘i kurbünde olan mahalleden olup Rumeli’nde Niğbolu beyi iken vefât eden merhûm ve mağfûrun-leh Mustafa Bey b. Kubad’ın verâseti oğlu umdetü’l-ümerâ Hüseyin Bey’e ve sinni bulûğa mütehammil olduğu hâlde bulûğuna mu‘terif olan diğer oğlu Mehmed Çavuş’a ve sagīr oğlu Ali Çavuş’a ve sagīre kızları Âişe ve Rabia ve Fatıma ve Emine ve Ümmühan’a münhasıra olup mûmâ-ileyh Hüseyin Bey ve sagīr oğlu Ali Çavuş’a ve sagīre kızlara kıbel-i şer‘den vasîleri olan umdetü’l-emâcid ve’l-ekârim Mustafa Efendi b. Süleyman meclis-i şer‘de müşârün-ileyh Mehmed Çavuş mahzarında takrîr-i merâm edip işbu sahîfede zikri âtî çiftlik harâba müşrif olduğundan gayrı zarûret-i nafaka ve zarûret-i kısmet olmağile bey‘i zikr olunan sagīr ve sagīreler enfa‘ olmağın müteveffâ-yı merkūmun cümle muhallefâtından olup mahrûse-i mezkûre havasında Karadeniz yalısında Hacı Ömerli nâm karyede vâki‘ olup bir çatma çardağı ve bir çatma damı ve iki anbarı ve iki kıt‘a bağı müştemil olup müteveffâ-yı merkūma müntemî olmağile müstağniyyün ani’t-tahdîd ve’l-a‘yân mülk çiftlikde ve içinde olan esbâb-ı hırâset ve âlât-ı zirâ‘atda ve on iki re’s su sığırı ineğinde ve dokuz re’s buzağısında ve üç çift su sığırı öküzünde ve üç çift karasığır öküzünde ve altı re’s karasığır ineğinde ve dört re’s buzağısında ve on bir sehmden dokuz sehm-i şâyi‘i Sûk-ı sultânîde li-maslahati’l-bey‘ mecâlis-i tâlibîne arz etdiğimizde gıbbe inkıtâ‘i’r-ragabât mûmâ-ileyh Mehmed Çavuş üzerinde yirmi dört bin akçede karâr edip ziyâde ile rağbet eder kimse olmamağın zikr olan çiftlikde ve beynlerinde ilm-i şer‘î ile ma‘lûm âlât-ı zirâ‘atda ve hayvanât-ı ma‘dûde-i mezbûrede on bir sehmden dokuz sehm şâyi‘i bi’l-asâle ve’l-vesâye mûmâ-ileyh Mehmed Çavuş’a meblağ-ı merkūm yirmi dört bin akçeye safka-i vâhide ile bey‘-i bâtt-ı şer‘î ile bey‘ edip teslîm-i mebî‘ ve kabz-ı semen eyledik deyip ve zikr olunan çiftlik ile tasarruf olunu gelip lede’l-ahâli ma‘lûmü’l-hudûd olan mezâri‘ ve merâti‘de hakk-ı tasarrufu sâhib-i arz ma‘rifetiyle müşârün-ileyh Mehmed Çavuş’a tefvîz edip mukābele-i tefvîzde altı bin akçesin alıp kabz ve zabt eyledik deyü ikrâr ve i‘tirâf etdiklerinde mâ-hüve’l-vâki‘ gıbbe’t-tasdîk kayd olundu. Fî 12 Şevvâl sene 1005. Şühûdü’l-hâl: Mustafa Çelebi b. Yunus, Mustafa Çavuş b. el-Hâc Kasım, Mehmed b. Ramazan, Hüseyin Çavuş b. Abdullah, Mustafa b. Mahmud, Mehmed b. Osman, Ahmed b. Ali, Hasan b. Abdullah, Mustafa b. Abdullah, Ferhad b. Abdullah, Mehmed b. Abdullah el-cündî ve gayruhum.