İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 242 Hüküm no: 242 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasna bt. Abdullah’ın eşi Ramazan Bey’in muhallefatından hissesini aldığı Mahmiye-i Kostantıniyye’de Mirâhor mahallesinde bundan akdem vefât eden merhûm Ramazan (…) Bey b. Abdullah nâm solağın zevcesi ve vârisesi olan Hasna bt. Abdullah nâm hatun meclis-i şer‘-i şerîfde merhûm-ı mezbûrun Mehmed ve Fatıma nâm veledeyn-i sagīreynine vasîyy-i muhtârı (…) hasm-ı şer‘î mahzarında nehc-i şer‘î üzere vesâyeti sâbite olan el-Hâc Lütfi b. Abdullah nâm kimesne muvâcehesinde takrîr-i kelâm edip merhûm-ı mezbûrun muhallefâtından olup mahalle-i mezkûrede vâki‘ olup inde’l-cîrân ma‘lûmetü’l-hudûd olan menzilden sümün hisse-i şer‘iyemi hâssa mi‘mârlarından Mehmed Bey b. Abdullah nâm kimesneye ifrâz etdirip hüccet-i şer‘iye etdirdiğim yerleri alıp kabz eyledim ve merhûm-ı mezbûrun yine mahalle-i mezbûrede vâki‘ olup tahdîd ve tavsîfden mustağnî olan kahvehânesini taksîme mecâl olmamağın mezkûr mi‘mâra ve bî-garaz Müslümânlara kısmet-i sahîhasıyla takvîm etdirdiğimde yirmi beş bin akçe ile takvîm etdiklerinde ve hâric-i hısn-ı mahmiye-i mezkûrede vâki‘ olup merhûm-ı mezbûra intimâyla tavsîf ve tahdîdden mustağnî olan bostan dahi kısmet-i sahîha ile takvîm olunmağa râzı olduğum ecilden yine mezkûr mi‘mâr ve sâir Müslümânlar zikr olunan bostanı otuz bin akçe ile takvîm etdiklerinde ve merhûm-ı mezbûrun sâir muhallefâtı ve nukūdu dahi elli iki bin yedi yüz otuz altı akçe olduğunda bu cihetle kahvehâne ve bostanın kıymetleri vesâir nukūd ve muhallefât cem‘an yüz yedi bin yedi yüz otuz altı akçe olup bundan sümün hisse-i şer‘iyem on üç bin dört yüz altmış yedi akçe olup bu zikr olunan hisse-i şer‘iyemi vasîyy-i mezkûr yedinden bi’t-tamam ve’l-kemâl alıp kabz eyledim. Merhûm-ı mezbûrun muhallefâtına müte‘allik sagīreyn-i mezkûreyn ile bi-vechin mine’l-vücûh da‘vâ ve nizâ‘ım yokdur deyü bi’t-tav‘ ve’r-rızâ ikrâr-ı sahîh-i şer‘î ve i‘tirâf-ı sarîh-i mer‘î kıldıkda mukırre-i merkūmenin ikrâr-ı meşrûhun vasîyy-i mezbûr dahi bi’l-muvâcehe tasdîk ve tahkīk etdikde vâki‘ hâl gıbbe’t-taleb ve’s-suâl ketb olunup yed-i tâlibe vaz‘ olundu ki lede’l-hâce müzekkir-i mâ-cerâ ola. Tahrîren fî-evâili Cumâdelûlâ li-sene elf. Şühûdü’l-hâl: Abdurrahim b. Pîrî el-imâm, Hasan b. Ömer el-müezzin, Mehmed b. Pîrî el-müezzin, Mehmed b. Abdullah, Ahmed Bey b. Abdullah, Bayram b. Mahmud, Şaban b. Abdullah, Ömer b. İlyas, Süleyman Bey b. Ali, Ali Bey b. Abdullah, Mehmed Bey b. Hızır, Şaban Bey b. Murad, Arslan Bey b. Abdullah.