İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 243 Hüküm no: 243 Orijinal metin no: [52a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güllü Hatun Vakfı’nın ölen Mehmed Çavuş’tan alacağı olduğu Fahrü’l-ekâbir ve’l-e‘âlî müstecmi‘u cemî‘i’l-mehâmid ve’l-me‘âlî zahrü’s-sâdât es-Seyyid Şa‘bân b. es-Seyyid Abdülazîz ve Pîrî Bey b. Yusuf ve Mehmed b. İsmail el-müezzin ve Hasan Bey b. Abdullah nâm kimseler meclis-i şer‘i şerîfe hâzırûn olup, mahmiye-i Kostantıniyye mahallâtından Akşemseddin mahallesinde bundan akdem vefât eden Mehmed Çavuş’un Kaya nâm sagīr oğluna kıbel-i şer‘den mansûb vasî olan fahrü’l-akrân Mehmed b. Ahmed nâm hasm-ı câhid mahzarında, merhûme Güllü Hatun bt. Abdullah’ın vakfına mütevellî olan Mehmed b. Ali’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun üzerinde ve zimmetinde mütevellî-yi mesfûr ile yaptığı mu‘âmele cihetinden vakf-ı mezbûra râyicü’l-vakt sekiz bin beş yüz akçe-i Osmânî lâzımü’l-edâ ve vâcibü’l-kazâ deyni vardır. Hakkını kısmen veyâ tamamen ahz ü kabz etmediğine, müteveffâyı mezkûrun hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-i merkūm tahlîf edilmeğin gıbbe ri‘âyeti şerâiti’l-kabûl hâkim-i muvakkı‘ a‘lâ hâze’l-kitâb bi-tevkî‘ihi’ş-şerîfi’l-müstetâb şehâdetleri mûcebince meblağ-ı mezbûrun müteveffâ-yı mezkûrun muhallefâtından edâsına hükmetti. Cerâ zâlike ve hurrire fî-evâsıtı Cumâdelûlâ min-şühûri sene elf mine’l-hicreti’n-nebeviye. Şühûdü’l-hâl: Haydar b. Abdullah, Mehmed b. Ali, Mustafa b. Abdullah, es-Seyyid Ali b. es-Seyyid Ahmed, Derviş b. Mehmed, Mehmed Bey b. Abdullah, Ahmed b. Abdullah, Mehmed b. Ramazan el-muhzır, Mustafa b. Mahmud, el-muhzır ve gayruhum