İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 245 Hüküm no: 246 Orijinal metin no: [53a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Hasan Bey’in ölen kocası Nasuh Bey’in muhallefatından alacağı olduğu el-Hâc Yusuf b. Ali et-tâcir ve el-Hâc Behram Bey b. Abdullah ve Mehmed Bey b. Abdullah ve Tâhir Bey b. Abdullah nâm kimseler meclis-i şer‘-i şerîfe hâzırûn olup hâl-i hayatında mahmiye-i Kostantıniyye mahallâtından Davudpaşa mahallesinde sâkin iken bundan akdem tarîk-ı Hicaz’da vefât eden merhûm Hasan Bey b. Abdullah’ın zevcesi ve vârisi olan ve husûs-ı âti’l-beyânı münkire bulunan Lalezar bt. Abdullah nâm hatun mahzarında, mahalle-i mezbûrede bundan akdem vefât eden Nasuh Bey’in Âişe nâm sagīre kızının vasîyy-i şer‘îsi olup vesâyeti bimâ hüve nehcü’s-sübût şer‘an sâbit olan Sinan Bey b. Abdurrahim’den ve müteveffâ-yı mezkûr Nasuh Bey’in zevcesi Râziye bt. Hasan Bey kıbelinden da‘vâya vekâleti bimâ hüve nehcü’s-sübût şer‘an sâbit olan fahrü’l-emâsil ve’l-akrân Hüseyin Ağa b. Murad’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mastûr Hasan Bey’in zimmetinde, sagīre-i mezkûrenin ve müvekkile-i merkūme Râziye hatunun mûrisleri Nasuh bey’in muhallefâtından râyicü’l-vakt yirmi dört bin beş yüz akçe-i Osmânî hakkı vardır. Şu cihetle ki, mezkûr Hasan Bey sagīre-i mezkûreye vasî olup Nasuh Bey’in muhallefâtına vâzı‘-ı yed ettiğinde cemî‘ muhallefâtı satıp semeni olan meblağ-ı mezbûru kabzetti. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten, müdde‘iye-i mesfûreye hissesini bi-vechin mine’l-vücûh almadığına ve ibrâ etmediğine dâir yemîn verildikten sonra hâkim şehâdetleri mûcebince hükmetti. Cerâ zâlike ve hurrire fî-evâsıtı Cumâdelûlâ min-şühûri sene elf. Şühûdü’l-hâl: Mustafa Bey b. Abdullah ez-zevvâk-ı sultânî, Nasuh Bey b. Abdullah el-cündî, Sinan Bey b. Abdullah, Hüseyin Bey b. Abdullah es-silâhî, Ahmed Bey b. Abdullah, Mahmud Bey b. Abdullah, Murad Bey b. Abdullah, Mehmed b. Mustafa, Mustafa b. Mahmud el-muhzır, Mehmed b. Ramazan el-muhzır ve gayruhum