İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 252 Hüküm no: 259 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çavuş’un muhallefatında yer almayan at, kılıç vesairenin büyük oğlu Hüseyin’e sağlığında hibe ettiği Mahrûse-i Kostantıniyye mahallâtından Koca Mustafa Paşa mahallesinde vefât eden merhûm Süleyman Çavuş b. ( ) nâm kimesnenin veled-i sagīri Mehmed’e kıbel-i şer‘den vasî olan Hamza Çavuş b. Hüseyin nâm kimesne meclis-i şer‘-i şerîfde merhûm-ı mezbûrun veled-i âharı Hüseyin Çelebi mahzarında takrîr-i kelâm edip mezbûr Hüseyin Çelebi’de merhûm-ı mezbûrun bir siyâh atı ve bir gümüşlü rahtı ve bir seyfi sîmi vardır mezkûr Hüseyin Çelebi zikr olunan atı ve rahtı ve kılıcı kısmete idhâl etmemişdir, taleb ederin suâl olunup sagīr-i merkūmun dahi onlarda hisse-i şer‘iyesi ifrâz olunması lâzımdır dedikde mezbûr Hüseyin Çelebi’ye suâl olundukda zikr olunan atı ve rahtı ve kılıcı merhûm babam Süleyman Çavuş hâl-i hayatında ve kemâl-i sıhhatinde bana hibe-i sahîha-i ile hibe ve temlik edip ben dahi kabûl ü kabz ve tesellüm edip bir nice yıldır mülkiyet üzere tasarruf ederim. Benim mülk-i mevhûbumdur deyü cevâb verip mezbûr Hamza Çavuş hibe-i mezbûre’i münkir olmağın merhûm Hüseyin Çelebi’den kelâm-ı meşrûhuna muvâfık beyyine taleb olundukda udûl-i Müslimînden ve ahrâr-ı muvahhidînden Ömer Bey b. Mehmed nâm sipâhî ve Yusuf b. Abdullah nâm yeniçeri li-ecli’ş-şehâde hâzırân olup fi’l-vâki‘ merhûm-ı mezbûr münâza‘un fîh olan feres-i esvedi ve gümüşlü rahtı ve gümüşlü kılıcı mezbûr Hüseyin Çelebi’ye hâl-i hayatında ve <> sıhhatinde hibe ve temlik edip ol dahi kabz ve tesellüm eyleyip nice müddet mülkiyet üzere tasarruf etmişdir, kendinin mülk-i mevhûbudur. Şâhidiz şehâdet-i şer‘iye dahi ederiz dediklerinde gıbbe’t-ta‘dîl ve’t-tezkiye şehâdetleri hayyiz-i kabûlde vâki‘ olup zikr olunan at ve raht ve kılıc-ı mezkûr Hüseyin Çelebi’nin mülk-i mahzı olmak üzere hükmolunup vâki‘ hâl gıbbe’t-taleb ve’s-suâl ketb olunup yed-i tâlibe vaz‘ ve def‘ olundu ki lede’l-hâce müzekkir-i mâ-cerâ ola. Tahrîren fi’l-yemi’s-sâni ve’l-ışrîn min-şehri Cemâziyelevvel li-sene elf. Şühûdü’l-hâl: Şah Mehmed b. Ahmed el-hatîb, Mustafa Bey b. Abdullah, Hüseyin Bey b. Abdullah, Mehmed Bey b. Abdullah, Abdi b. Turgud, Yunus Bey b. Abdullah, Mehmed b. Ramazan el-muhzır, Mustafa b. Mahmud el-muhzır ve gayruhum.