İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 253 Hüküm no: 261 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çavuş’un büyük oğlu Hüseyin Çelebi’nin babasının mirasından bir şey saklamadığı Mahmiye-i Kostantıniyye mahallâtından Koca Mustafa Paşa mahallesinde vefât eden merhûm Süleyman Çavuş <> nâm kimesnenin sagīr oğlu Mehmed’e kıbel-i şer‘-i şerîfden vasîyy-i şer‘î nasb olunan Hamza Çavuş b. Hüseyin nâm kimesne mahfil-i kazâda merhûm-ı mezbûrun kebîr oğlu Hüseyin Çelebi muvâcehesinde takrîr-i kelâm edip merhûm-ı mezbûrun muhallefâtından mezbûr Hüseyin Çelebi ba‘zı esbâb ve nukūd saklayıp verese beyninde taksîm etdirmemişdir vesâyetim hasebiyle taleb ederim suâl olunsun dedikde gıbbe’s-suâl merkūm Hüseyin Çelebi yedinde merhûm-ı mezbûrun nukūd ve esbâbından bir akçe ve bir habbesi <> ve bir esbâbı yokdur ve saklamadım deyü cevâb vermeğin müdde‘î-yi mezbûrdan da‘vâsına muvâfık beyyine taleb olundukda izhâr-ı beyyineden âciz ve kāsır oldukda merkūm Hüseyin Çelebi merhûm-ı mezbûrun nukūd ve esbâbından nesne saklayıp ve saklamadığına istihlâf olunsun demeğin merkūm Hüseyin Çelebi’ye vech-i meşrûh üzere yemîn billâh teklif olundukda mezbûr Hüseyin Çelebi babasını merhûm-ı mezbûrun nukūd ve menkūlâtından vesâir ism-i mâl ıtlâk olunur nesnelerden nefîr ü kıtmîr nesne saklamayıp ve saklanmadığına yemîn billâh etdikde kat‘-ı nizâ‘ ve fasl-ı husûmet olunup vasîyy-i mezkûr da‘vâ-yı mezbûresinden men‘ olunup vâki‘ hâl bi’t-taleb ketb olunup yed-i tâlibe vaz‘ olundu ki lede’l-hâce kâşif-i mâ-cerâ ola. Tahrîren fî-evâhiri Cemâziyelûlâ min-şühûri li-sene elf. Şühûdü’l-hâl: es-Sâbikūn