İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 283 Hüküm no: 308 Orijinal metin no: [64b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın vasiyeti Dârü’s-saltanatü’s-seniyye Kostantıniyyetü’l-mahmiye’de vâki‘ Avratpazarı kurbündeki Kürkçü mahallesi imâmı mevlana Mehmed b. Veli ve Perviz b. Abdullah el-haffâf nâm kimseler meclis-i şer‘a hâzırân olup bundan akdem mahalle-i mezbûrede vefât eden Âişe Hatun bt. Abdullah nâm hatunun muhallefâtına vâzı‘-ı yed olan mahmiye-i mezkûrede vâki‘ Beytü’l-mâl-i hâs emîni aynü’l-a‘yân ve zeynü’z-zaman Abdullah Çavuş b. Hızır mahzarında, hâfız-ı hâze’s-sifri’ş-şer‘î fahrü’s-sâdât Seyyid Gülâbî b. Seyyid Yusuf’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, merhûme-i mezbûre hâl-i hayatında ve kemâl-i aklında cemî‘ sülüs-i mâlını techîz ve tekfîni ile tabh-ı ta‘âma ve sâir vücûh-i hayrât ve sunûf-i meberrâta vasiyet etti ve müdde‘î-yi müşârün-ileyhi de vasiyetlerinin tenfîzine vasîyy-i muhtâr seçti. Mezbûre Âişe Hatun vasiyeti üzere mukırraten ve musırraten vefât etti. Cerâ zâlike ve hurrire fî-evâili şehri Muharremi’l-harâm li-sene selâse ve elf. Şühûdü’l-hâl: el-Hâc Süleyman b. Halil el-müezzin, el-Hâc Receb b. İbrahim el-imâm, Mehmed Bey b. Abdullah el-cündî, Ömer b. Kasım, Veli b. Mustafa, İsmail b. Bektaş, Yusuf b. Yahya, Haydar b. Mustafa, Mehmed b. Ramazan, Mustafa b. Mahmud, Ferhad b. Abdullah ve gayruhum