İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 290 Hüküm no: 322 Orijinal metin no: [66a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatı Beytülmal tarafından zabtedilen Hasan’ın hanımına mehir borcu olduğu Seyyid Mustafa b. Seyyid Cemaleddin ve Sinan Kethudâ b. Abdullah nâm kimseler meclis-i şer‘a hâzırân olup mahmiye-i Kostantıniyye hısnı ebvâbından Eyüpkapısı kurbündeki Mustafa Paşa mahallesinde bundan akdem vefât eden merhûm Hasan b. Sadi’nin muhallefâtına vâzı‘-ı yed olan Dârü’s-saltanati’s-seniyye mahmiye-i Kostantıniyye’de vâki‘ Beytü’l-mâl-i hâs emîni Abdullah Çavuş b. Hızır mahzarında, müteveffâ-yı mezbûrun zevcesi Âişe bt. Yusuf nâm hatundan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, mezbûre Âişe hatunun esnâ-yı nikâhında ma‘kūdun aleyh olan mehr-i müecceli cihetinden müteveffâ-yı mezbûr zevci üzerinde râyicü’l-vakt bin akçe hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zalike fi’t-târihi’l-mezbûr. Şühûdü’l-hâl: Mehmed b. Ramazan, Mustafa b. Mahmud, Mustafa b. İlyas, Ferhad b. Abdullah