Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 503 Hüküm no: 602 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. Salamon’un İsak v. Abraham’da şirketlerini feshetmeleri sebebiyle alacağı olduğu Min mümzâtihî Mahrûse-i İzmir’de sâkin tüccârdan işbu bâ‘isü’l-vesîka Mosi v. Salamon nâm yahudi meclis-i şer‘-i şerîf-i enverde İsak v. Abraham nâm yahudi muvâcehesinde üzerine da‘vâ ve takrîr-i kelâm edip bundan akdem ben malımdan bin beş yüz esedî ve mezbûr İsak bin üç yüz guruş ve gāib ani’l-meclis Azarya nâm yahudi yedi yüz guruş ifrâz ve halt ve mezbûrân ile ticâretde akd-i şirket edip yirmi iki ay şirket üzre bey‘ u şirâdan sonra şirket-i mezkûreyi fesh ve İstanbul’da Yenihan demekle ma‘rûf handa hesâbımız görüldükde asl-ı malımdan olan meblağ ve İzmir’de âhardan istidâne ve iştirâ edip gönderdiğim çuka ve kumaş ve sâir emti‘a bahâlarından min haysi’l-mecmû‘ beş bin dört yüz esedî guruş hakkım mezbûr İsak ba‘de’l-kabz kendi mesârifine sarfla istihlâk eylediği zâhir ve müte‘ayyin olup hattâ mezbûr İsak meblağ-ı mezbûr beş bin dört yüz esedî guruşu ber vech-i mastûr bana zimmetinde lâzımü’l-edâ deyni olduğunu alâ isri’ş-şehâde ikrâr ve işhâd ve deyn-i mezbûrunu nâtık yedime temessük dahi vermişiken mezbûr İsak meblağ-ı mezbûru bana edâ ve teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezkûr İsak cevâbında müdde‘î-i mezbûr ile ber vech-i muharrer şerîkler olup yirmi iki ay şirket üzre bey‘ u şirâyı ikrâr lâkin meblağ-ı mezbûru kabz ve istihlâkini inkâr edicek müdde‘î-i mezbûrdan müdde‘âsına beyyine taleb olundukda tâife-i yahudun Sinyora cemâ‘atinden olup Hasköy’de sâkin haham Abraham v. İlya ve Portakal cemâ‘atbaşısı Arslan v. David ve mârrü’z-zikr Yenihan’da sâkin David v. Yasef nâm yahudiler li ecli’ş-şehâde meclis-i şer‘a hâzırûn olup isre’l-istişhad fi’l-vâki‘ mezbûr Mosi merkūm İsak ile hân-ı mezkûrda şirket-i muharrere-i mezkûreyi ba‘de’l-fesh hesâb gördüklerinde müdde‘î-i mezbûrun asl-ı mâlı olan bin beş yüz esedî ve İzmir’de âhardan istidâne ve iştirâ edip gönderdiği çuka ve kumaş ve sâir emti‘a bahâsından müdde‘î-i mezbûrun merkūm İsak’ın kabz ve kendi mesârifine sarfla istihlâk eylediği beş bin dört yüz esedî guruş hakkı zuhûr edip hattâ mezbûr İsak meblağ-ı mezbûr ber vech-i mastûr müdde‘î-i mezbûra zimmetinde lâzımü’l-edâ ve vâcibü’l-kazâ deyni olduğunu bizim huzûrumuzda ikrâr ve bizi işhâd edip deyn-i mezbûru nâtık temessük dahi vermişdi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î ve’l-kazâi’l-mer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Çavuş el-Mübâşir, Mustafa Çelebi b. el-Hâc Ahmed, Mustafa Çelebi b. Abdurrahman, İbrahim b. Ahmed, Mehmed b. İdris, Ali b. Bâli.