Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 504 Hüküm no: 603 Orijinal metin no: [103b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefaletleri sebebiyle hapsedilmiş olan Mehmed b. Abdullah ile oğlu Mustafa’nın serbest bırakılması Edâya tenbîh Mahmiye-i İstanbul’da Çelebioğlu mahallesinde sâkin olup Arîfe nâm hâtuna cihet-i kefâletden sekiz bin guruş deyni için üç ay Çavuşbaşı Ağa hapsinde dört ay sicn-i sultânîde mahbûslar olan işbu bâ‘isü’l-vesîka Mehmed b. Abdullah nâm mühtedî ile oğlu Mustafa’nın keyfiyyet-i hâllerin istifsâr için fermân-ı âlî sâdır olmağın imtisâlen-leh mezbûrân Mehmed ve Mustafa’dan vech-i âtî üzre istişhâd-ı şer‘î sudûrundan sonra yine mahalle-i mezbûre ahâlîsinden imâm Mustafa b. Halil ve Mehmed b. Mehmed ve Mustafa b. Mehmed ve el-Hâc Ahmed b. Ali ve el-Hâc İsmail b. Ali ve el-Hâc Ahmed b. Mustafa ve Mustafa b. Receb ve Ahmed b. Murtaza ve Veysel b. Yakub ve Abdullah b. el-Hâc Ali li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûrân Mehmed ve Mustafa’nın üzerlerinde lâbis oldukları köhne libâslarından mâ‘adâ ism-i mâl ıtlâk olunur kat‘â nesneleri olmayıp müflis ve mu‘dim olduklarına biz şâhidleriz şehâdet dahi ederiz deyû her biri edâ-i şehâdet-i şer‘iyye ettikde, ba‘de’t-ta‘dîl ve’t-tezkiyye şehâdetleri makbûle olmağın mezbûrânın hasmı hâzır olmamağla mahmiye-i mezkûrede Alacamescid kurbunda sâkin Mehmed Ağa b. Mehmed mezbûrân Mehmed ve Mustafa’nın nefslerine ve hîn-i mütâlebede meclis-i şer‘a ihzârlarına kefîl olmağın kudret-i mâl ve vüs‘at-i hâlleri vusûlüne değin, mezbûrân Mehmed [ve] Mustafa hapisden ıtlâk ve sebîlleri tahliyye olunup işbu vesîka ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Çelebi b. el-Hâc Ali, Yusuf Çavuş b. Hasan, es-Seyyid Seyfullah Çelebi, Mehmed Ağa b. Ahmed, Hasan Beşe b. Mahmud, Mehmed b. Hasan.