Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 505 Hüküm no: 604 Orijinal metin no: [104a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nevros v. İdemor’un bağlarını Kostantin v. Haçik’e satması Fi’l-asl vilâyet-i Anadolu’da Eğin kazâsına tâbi‘ Şirzin nâm karye ahâlîsinden olup mahmiye-i İstanbul’da kemerci tâifesinden Nevros v. İdemor nâm zimmî meclis-i şer‘-i şerîfde damâdı bâ‘isü hâze’s-sifr Kostantin v. Haçik nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup karye-i mezbûrede vâki‘ bir tarafdan Hızır nâm kimesne menzili ve bir tarafdan Bogos bağı ve iki tarafdan tarîk-i âm ile mahdûd bir kıt‘a bağ ve içinde şarabhâne odası ve yine Ovarı? nâm mevzi‘de vâki‘ bir tarafdan Ahmed Beşe bağı ve bir tarafdan Hanım bağı ve iki harâbe ile mahdûd iki kıt‘a bağımı cümle tevâbi‘ ve levâhıkı ve kâffe-i hukūk ve merâfıkı ile mezbûr Kostantin’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yüz beş esedî guruşa bey‘ ol dahi ber vech-i muharrer iştirâ ve kabûl ettiğinden sonra semenleri olan meblağ-ı mezbûr yüz beş esedî guruşu mezbûr Kostantin yedinden tamâmen ahz u kabz eyledim ba‘de’l-yevm zikr olunan bağları mahallerinde zabt ve tasarrufa mezbûr Kostantin’i taslît eyledim keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed b. İsmail, Bayram Beşe b. Mehmed, İsmail Beşe b. İskender, Ali b. Mehmed, Haydar b. Mustafa, Abdurrahman b. Hızır, Ferşat v. Bahtik, Lemil v. Nikola, Angeli v. Altun, Haçuk v. Asvador.