İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 308 Hüküm no: 355 Orijinal metin no: [70b-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatı Beytülmal tarafından zabtedilen İslam b. Habib’in evinin müzayede ile satıldığı Âti’l-beyân müteveffânın muhallefâtına vâzı‘-ı yed olan Dârü’s-saltanati’s-seniyye mahmiye-i Kostantıniyye’de vâki‘ Beytü’l-mâl-i hâs emîni aynü’l-a‘yân Abdullah Çavuş b. Hızır meclis-i şer‘-i şerîfe hâzır olup, bundan akdem mahmiye-i Kostantıniyye mahallâtından Çukurbostan mahallesinde vefât eden İslâm b. Habib’in muhallefâtındaki, mahalle-i mezbûrede vâki‘, hudûdu bir tarafından Hadice bt. Mehmed mülkü, bir tarafından Rencber Sinan mülkü, bir tarafından da tarîk-ı âm ile mahdûd olan çatma ta‘bîr edilen ahşabdan ma‘mûl iki hâneyi cümle tevâbi‘i ve levâhıkı ile râyicü’l-vakt dokuz bin akçe semen-i mu‘ayyen-i makbûzla bâ‘is-i hâze’s-sicil fahrü’l-eşbâh Osman Bey b. Abdullah nâm cündiye îcâb ve kabûlü hâvî bey‘-i bâtt-ı sahîh-i şer‘î ile bey‘ ettiğini ikrâr eyledi. Mezbûr Osman Bey dahi kendi mâlıyla ve li-nefsihî iştirâ eyledi. Mubâya‘a-i mezbûre, menzileyn-i mesfûreynin, Beytü’l-mâl emîni kâtibi fahrü’l-muharrirîn İbrahim Bey b. Abdulmuin ma‘rifeti ile sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fî-evâsıtı şehri Rebî‘i’l-âhir li-sene selâse ve elf. Şühûdü’l-hâl: Mevlana Hasan b. Pîrî el-imâm, Yusuf b. Behram, Mustafa b. Abdullah, Ali b. Ömer, Mehmed b. Rıdvan