İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 311 Hüküm no: 361 Orijinal metin no: [71b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Davud Ağa’nın İbrahim b. Yakub’a borcu olduğu Ricâl-i udûl ve sikāt-ı fühûlden Ali Çelebi b. Ahmed ve Mevlana Mustafa b. Hızır el-imâm ve Mehmed b. Ahmed nâm kimseler meclis-i şerî‘at-i şerîfe-i garrâ ve mahfil-i tarîkat-i münîfe-i zehrâya hâzırûn olup Dârü’s-saltanatü’s-seniyye mahmiye-i Kostantıniyye mahallâtından Aydın Kethudâ mahallesinde vefât eden merhûm Davud Ağa b. Abdi’nin oğlu fahrü’l-akrân Mustafa Çavuş mahzarında, hâfız-ı hâze’l-kitâb İbrahim b. Yakub’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr hâl-i hayatında bizim yanımızda ve katımızda müdde‘î-yi mezkûr İbrahim’e karz-ı şer‘î cihetinden tammü’l-vezn ve sahîhü’l-ayâr yüz altın sikke deyni olduğunu ikrâr ve i‘tirâf etmişti. Hakkını kısmen veyâ tamamen ahz ü kabz etmediğine, hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-yi merkūm tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâhiri şehri Rebî‘i’l-âhir li-sene selâse ve elf. Şühûdü’l-hâl: Mustafa b. Mahmud, Mehmed Bey b. Mahmud, Mustafa b. Hızır ve gayruhum