İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 312 Hüküm no: 362 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş b. Abdülmennan’ın Rabia bt. Ali’den satın aldığı ev Bu sahîfe-i sahîha-i şer‘iyetü’l-imâdî (…) enîka-i mer‘iyeti’l-matâvî tahrîr ve (…) dâ‘î budur ki; Dergâh-ı felek-iştibâh ve sa‘âdet-i destgâh çavuşlarından aynü’l-a‘yân makbûlü’s-sıdk ve’l-ekârim Ahmed Çavuş b. Abdülmennan meclis-i şer‘-i şerîfe hâzır olup sâbıkā üveyi kızı olan işbu bâ‘isetü’l-kitâb fahrü’l-muhadderât Rabia Hatun bt. Ali kıbelinden ikrâr-ı âti’l-beyânı tasdîka vekîl olup vekâleti Mustafa b. Abdullah ve Cafer b. Abdullah şehâdetleriyle nehc-i şer‘î üzere sâbite olan dergâh-ı felek-iştibâh sipâhîlerinden fahrü’l-akrân Ali Bey b. Abdullah muvâcehesinde ikrâr ve takrîr-i kelâm edip mahrûse-i Galata mahallâtından Alaca mahallesinde cev[â]nib-i erba‘ası Hamza Reis ve Mehmed Reis ve Ali Reis mülkleriyle ve tarîk-i âmla mahdûd olup bir bâb ulvî ve bir bâb süflî evleri ve muhavvata ve kenîf[i] müştemil olan mülk menzilimi ki sâbıkā mezbûre Rabia’nın vâlidesi olup benim hatunum olan (…) hibe etmiş idi. Merkūme Rabia Hatun on iki bin fıddî râyic fi’l-vakt bey‘-i bâtt-ı sahîh ile bey‘ eyleyip kabz-ı semen ve ikbâz-ı müsemmen kıldım dedikde bâyi‘-i merkūmun ikrâr-ı meşrûhunda vekîl-i mezbûr bi’l-muvâcehe tasdîk [ve] kabûl eyledikde mâ-hüve’l-vâki‘ bi’t-taleb kayd olundu. Tahrîren fi’t-târihi’l-mezbûr. Şühûdü’l-hâl: Mevlana Ahmed Efendi b. Mehmed, Mevlana Mehmed Çelebi el-imâm ve gayruhum mine’l-huzzâr.