Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 506 Hüküm no: 606 Orijinal metin no: [104a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Süleyman’ın Karasaka v. İtsak’ta tavuk satışından alacağı olduğu Mahmiye-i İstanbul’da Sultan Bayezid-i Velî Câmi‘i kurbunda tavukçu olan bâ‘isü hâze’l-kitâb Ali b. Süleyman tarafından husûs-ı âti’l-beyâna vekîl olan Hüseyin b. Mehmed nâm kimesne meclis-i şer‘-i şerîf-i enverde mahrûse-i Galata’ya tâbi‘ Ortaköy’de sâkin Karasaka v. İtsak nâm yahudi muvâcehesinde üzerine da‘vâ ve takrîr-i kelâm edip müvekkilim mezbûr Ali’nin mezbûr Karasaka zimmetinde yedinden müşterâ ve makbûz adedi beynlerinde ma‘lûm tavuk bahâsından ba‘de küllî hesâb on yedi bin akçe hakkı olmağla hâlâ suâl olunup meblağ-ı mezbûru bana edâya tenbîh olunmak bi’l-vekâle matlûbumdur dedikde gıbbe’s-suâl mezbûr Karasaka cevâbında fi’l-hakīka müvekkil-i mezbûr Ali’ye ber vech-i muharrer cihet-i mezbûreden ba‘de küllî hesâb on yedi bin akçe zimmetimde lâzımü’l-edâ [de]ynimdir [deyû] bi tav‘ihî ikrâr etmeğin alâ mûcebi i‘tirâfihî meblağ-ı mezbûru müdde‘î-i mezbûra edâ ve teslîme mezbûr Karasaka’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. el-Hâc Ahmed, Hüseyin b. Mustafa, Mehmed Çelebi b. Mehmed.