Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 508 Hüküm no: 608 Orijinal metin no: [104b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeriler 43. Cemaat Oda Vakfı muhasebesi Min mümzâtihî Dergâh-ı âlî yeniçerilerinin Kırk Üçüncü cemâ‘atine mahsûs oda ahâlîsinden nukūd-ı mevkūfelerine hâlâ mütevellî olan Ali Ağa b. Abdullah meclis-i şer‘-i şerîf-i enverde oda-i mezkûre ahâlîsinden olup vakf-ı mezkûra mütevellî iken vefât eden el-Hâc Mustafa b. Piyâle’nin verâseti zevce-i metrûkesi Râbia bt. Hüseyin ile sulbî kebîr oğlu Mehmed Çelebi ve sulbiye kebîre kızı diğer Râbia’ya münhasıra olduğu şer‘an zâhir ve müte‘ayyin oldukdan sonra mezbûrûn Mehmed Çelebi ve Râbia ve diğer Râbia muvâcehelerinde üzerlerine da‘vâ ve takrîr-i kelâm edip mezbûr el-Hâc Mustafa vakf-ı mezbûra mütevellî oldukda asl-ı mâl-ı mezbûrun zimem-i nâsda olan bin sekiz yüz doksan beş guruşun temessükâtını kabz edip bir sene mikdârı mütevellî oldukdan sonra meblağ-ı mezbûrun nemâsından ba‘zı mesârif-i seferiyeye otuz üç bin sekiz yüz altmış akçe harc ve sarf edip ve hâlâ zimem-i nâsda mevcûd bin dört yüz doksan altı buçuk guruş ashâbından ihâle ve tevkîl ve temessükâtı bana teslîm ben dahi bi’t-tevliyye kabz ve kabûl eylediğimden sonra mâ‘adâ üç yüz doksan sekiz buçuk guruş asl-ı mâlı mücehhelen fevt olmağın hâlâ veresesi mezkûrûna suâl olunup tereke-i müteveffâ-yı mezbûrdan vakıf için bana edâ olunmak üzre tenbîh olunması matlûbumdur dedikde gıbbe’s-suâl mezbûrûn cevâblarında mûrisleri müteveffâ-yı mezbûrun mâl-ı vakf-ı mezbûrdan mesârif-i mezkûreye sarfı olan meblağ-ı mezkûrûndan üç bin sekiz yüz altmış akçeden mâ‘adâ hâlâ zimem-i nâsda mevcûd bin dört yüz doksan altı buçuk guruşa ashâbından müdde‘î-i mezbûra ihâle ve temessükâtı teslîm etmişidi deyû mütevellî-i mezbûru husûs-ı merkūmda tasdîk lâkin müteveffâ-yı mezbûr el-Hâc Mustafa’nın ziyâde üç yüz doksan sekiz buçuk guruş kabzı ma‘lûmumuz değildir deyû inkâr edicek müdde‘î-i mezbûrdan ziyâde müdde‘âsına beyyine taleb olundukda ityân-ı beyyine için istimhâl ve mehl-i şer‘î [105a] birle imhâl olunup işbu vesîka bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, Süleyman Çelebi Ser-bölük, el-Hâc Abdullah b. Mahmud, Mahmud b. Mehmed.