Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 509 Hüküm no: 609 Orijinal metin no: [105a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asvador v. Serkis’in Markar v. Toros’tan aldığı borç karşılığında bağını rehin vermesi (bey‘ bi’l-vefâ) Vilâyet-i Anadolu’da Eğin kazâsına tâbi‘ Alcağı nâm karye ahâlîsinden olup hâlâ mahmiye-i İstanbul’da Vâlide-i Atîk kurbunda habbâz olan Asvador v. Serkis meclis-i şer‘-i şerîf-i enverde işbu râfi‘ü’l-vesîka Markar v. Toros mahzarında ikrâr ve takrîr-i kelâm edip karye-i mezkûrda vâki‘ bir tarafdan Bağran zimmî bağı ve bir tarafdan Azat bağı ve bir tarafdan Haydar zimmî bağı ve bir tarafdan Sezal Murad bağı ile mahdûd kürûmu mülk bir kıt‘a bağımı mezbûr Markar’a üç yüz elli guruşa bey‘-i kat‘î ile bey‘ ve temlîk ol dahi iştirâ ve kabûl edip semeni olan meblağ-ı mezbûrun iki yüz altmış guruşu gāib ani’l-meclis Ferrâş oğlu Mehmed Çelebi’ye cihet-i deyn-i şer‘îden deynim olan iki yüz altmış guruşa mezbûr Markar emriyle kefîl olup bi hükmi’l-kefâle mezbûr Mehmed Çelebi’ye edâ ve teslîm etmekle ana takās, ol dahi mukāssa ve kabûl ve doksan guruşunu bana def‘ ve teslîm ben dahi kabz ve tesellüm edip bağ-ı mahdûd-ı mezkûru mahallinde kabz ve tasarrufa mezbûru taslît eylediğimden sonra târih-i kitâbdan iki sene tamâmında meblağ-ı mezbûr üç yüz elli guruşu merkūm Markar’a tamamen red ve teslîm eylediğimde ol dahi akd-i bey‘i fesh ve ikāleye ta‘ahhüd eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hüseyin Çelebi b. Mehmed, Ebûbekir Çelebi b. Hasan, Ömer b. Ali, Osman b. Ali, Ömer b. Hasan, Haçador v. Mıgırdiç, Abanos v. Bogos, Hokar v. Mıgırdak.