Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 509 Hüküm no: 610 Orijinal metin no: [105a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Hoka’nın terekesinden para ve eşyanın Haçador v. Köleriz’e teslimi Mahmiye-i İstanbul’da Kâtib Kasım mahallesi sükkânından iken bundan akdem Kudüs-i şerîf’de hâlik olan Kirkor v. Hoka nâm zimmînin sulbî kebîr oğlu ve hasren vârisi Azarya nâm Ermeni meclis-i şer‘-i şerîf-i lâzımü’t-teşrîfde eniştesi işbu sâhibü’l-vesîka Haçador v. Köleriz nâm Ermeni muvâcehesinde ikrâr-ı tâm ve takrîr-i kelâm [edip] mûrisim hâlik-i merkūmun merkūm Haçador zimmetinde emti‘a-i mütenevvi‘a bahâsından bin üç yüz esedî guruş hakkı olduğundan mâ‘adâ mûrisim hâlik-i merkūm hâl-i hayâtında bundan akdem Kudüs-i şerîf’e gider oldukda eşyâ-i memlûkesinden beş aded tencere ve dört sahan ve iki bakraç ve bir kahve tabağı ve dört kapaklı tas ve altı yorgan ve on üç Kürdî sarık ve dokuz aded taraklı badıla ve terbelli? badıla ve iki su sepeti ve bir kutnî ve dört ağabanî ve otuz beş boyalı tülbent ve bir alaca atlas ve üç mâî su sepeti ve bir çiçekli badıla ve bir tas kâse ve iki fincan ve bir döşek yüzü ve iki kalemkârî ve bir sîm kılıç ve bir tabancalı tüfenk ve yedi aded kilim ve bir sîm saçak ve dokuz aded fağfurî fincan ve sâir beynlerinde ma‘lûm emti‘aları merkūm Haçador’a bi’l-emâne def‘ ve teslîm ol dahi ahz u kabz eylediğinden sonra mûrisim hâlik-i mezbûr sâlifü’l-beyân Kudüs-i şerîf’de hâlik olup meblağ-ı mezbûr bin üç yüz esedî guruş ile zikr-i mürûr eden eşyâlar merkūm Haçador zimmetinde kalmışidi el-hâletü hâzihî meblağ-ı mezbûr bin üç yüz esedî guruşu ve zikr olunan eşyâları bana def‘ ve teslîm ben dahi yedinden bi’t-tamâm ahz u kabz edip meblağ-ı mezbûr bin üç yüz esedî guruşdan ve eşyâ-i mezkûreden zimmetinde bir şey kalmayıp mûrisim hâlik-i merkūmun terekesine müte‘allika âmme-i da‘vâdan merkūm Haçador’un zimmetini ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Sahhâf Sâlih Efendi, Osman Efendi es-Sahhâf, Osman Efendi b. el-Hâc Mahmud, eş-Şeyh Mehmed Efendi b. ( ), İbrahim b. Osman.