Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 510 Hüküm no: 611 Orijinal metin no: [105a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gümrük emîni Ali Ağa b. Abdurrahman’ın uncu taifesinden olan zimmilere un bedelini ödediği Uncu tâifesinden Yanaki v. Panayot ve Norki? v. Todori nâm zimmîler meclis-i şer‘-i şerîf-i enverde hâlâ gümrük emîni olan fahrü’l-emâcid ve’l-akrân el-Hâc Ali Ağa b. Abdurrahman Ağa tarafından husûs-ı âti’l-beyâna vekîl olan el-Hâc İsmail Ağa b. Osman mahzarında her biri ikrâr ve takrîr-i kelâm edip mahmiye-i İstanbul’da Acemoğlanı meydanı kurbunda Sekbân fırını ta‘bîr olunan fırında fodla için fermân-ı âlî mûcebince bin doksan yedi Cemâziyelâhiri’nin yirmi sekizinci gününden Ramazân-ı şerîfin sekizinci gününe gelince yetmiş günde her keyl ikişer yüz sekiz akçeye olmak üzre bizden iştirâ olunan üç bin üç yüz elli keyl dakīkin semeni olan cem‘an dokuz yük otuz sekiz bin akçeyi müvekkil-i mûmâ-ileyhden bi tarîki’l-havâle [105b] bi’t-tamâm ve’l-kemâl ahz u kabz eyledik meblağ-ı mezbûrdan el-yevm bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve tis‘în [ve elf]. Şuhûdü’l-hâl: İbrahim Çelebi b. Ahmed, Mehmed b. İdris, Hüseyin Efendi b. ( ).