İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 374 Hüküm no: 458 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferde vefat eden Kazgancılar Kethudası Mehmed’in evinin satılması Mahrûse-i İstanbul’da Beytü’l-mâl-i hâssa bi’l-fi‘il emîn olup mahrûse-i mezbûrede Samanviran nâm mahallede sâkin olup <> Kazgancılar Kethudâsı iken sefer-i hümâyûnda vefât eden Mehmed b. Abdullah’ın zâhirde vâris-i ma‘rûfu olmamağla muhallefâtına vâzı‘ü’l-yed olan fahrü’l-cüyûş Mehmed Çavuş b. Abdülmennan meclis-i şer‘de işbu bâ‘iset-i tahrîrü’l-kitâb umdetü’l-muhadderât Sâkine Hatun bt. Abdülmennan mahzarında takrîr-i merâm edip müteveffâ-yı merkūmun mahalle-i mezkûrede vâki‘ olup ulvî ve süflî iki evi ve bi’r-i mâ ve sofayı ve muhavvatayı müştemil olup bir cânibi el-Hâc Nasuh mülkü ile ve bir cânibi Hasan Çelebi b. ( ) mülkü ile ve bir cânibi Ahmed Çavuş mülkü ile ve bir cânibi tarîk-i âm ile mahdûd olan mülk menzili mukaddemâ mezbûre Sâkine Hatun’a altmış bin akçeye bey‘ olunup meblağ-ı merkūm altmış bin akçe Beytü’l-mâl-i mezkûr için kabz olunmuş iken menzil-i mezkûr bahâsından noksân ile bey‘ olunduğu muhakkak ve zâhir olup geri tâlibleri zuhûr etmeğin geri menzil-i mârrü’z-zikr sûk-ı sultânîde tâlibîne arz olundukda ragabât-ı tâlibîn tamam munkatı‘ oldukdan sonra geri mûmâ-ileyhâ Sâkine Hatun üzerinde <> yüz bin akçeden karâr edip ziyâde ile kimesne rağbet etmemeğin menzil-i merkūmu ki ve [cümle] tevâbi‘ ve levâhıkı ile müşârün-ileyhâ Sâkine Hatun’a <> yüz bin akçeye bey‘-i bâtt-ı şer‘î ile bey‘ ve teslîm edip sâbıkā teslîm etdiği meblağ-ı merkūm altmış bin akçeden doksan beş bin [yüz bin] akçe varıncaya dek bâkī olan <> kırk bin akçeyi dahi emânetim hasebiyle bi’t-tamam ve’l-kemâl mezbûre Sâkine Hatun yedinden kabz ve tesellüm eyledim deyü ikrâr-ı tav‘î etdikde mâ-vaka‘a gıbbe’t-tasdîk ve’t-taleb ketb olundu. doksan beş bin akçeye bey‘ olunup hüccet olunmuş iken geri tâlibler ziyâde olup yüz bin akçede mezbûre Sâkine Hatun’da karâr etmeğin geri yüz bin akçe ile hüccet yazıldı Fî 8 Receb sene 1005 Şühûdü’l-hâl: Sunullah Efendi b. Resul el-kādı, Mustafa b. İsmail, Mustafa Ağa b. Abdullah, Reyhan Ağa b. Abdullah, Mercan Ağa b. Abdullah, Süleyman Ağa b. Abdullah, Hacı Musa b. İvaz ve gayruhum.