İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 392 Hüküm no: 481 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habeşli köle Ferhan’ın Mehmed Bey tarafından azat edildiği İşbu uzun boylu açık kaşlı kara gözlü sol bâzûsunda âsâr-ı key ve boynunda eser-i cerh olan Ferhan b. Abdullah nâm abd-i Habeşî’den meclis-i şer‘-i şerîfde Beytü’l-mâl-i hâs emîni olup müteveffât-ı âti’z-zikre vekîl muhallefâtına vâzı‘ü’l-yed olan Mehmed Çavuş b. Abdulmuin mahzarında vech-i âti’l-beyân üzere da‘vâ ve istişhâd sudûrundan sonra fahrü’l-kuzât Mevlana Hayreddin Efendi b. Nureddin ve Ramazan Halîfe b. Mehmed ve el-Hâc Mehmed b. Osman li ecli edâi’ş-şehâde mahfil-i kazâya hâzırûn olup istişhâd olunduklarında fi’l-hakīka müdde‘î-i merkūmun müdebberi olan Mehmed Bey b. Temürboğa vefâtından üç ay mukaddem hâl-i sıhhat ve kemâl-i aklında bizim huzûrumuzda ikrâr edip hilye-i merkūme ile mücellâ olan abdımı bundan esbak tedbîr-i mutlak ile müdebber eylemiş idim. Hâlâ i‘tâk ve tahrîr eyleyip mülkümden ihrâc eyledim dedi biz bu husûsa şâhidleriz şehâdet dahi ederiz deyü bi’l-muvâcehe edâ-i şehâdet-i şer‘iye eylediklerinde ba‘de ri‘âyeti şerâiti’l-kabûl şehâdetleri makbûle olup abd-i merkūmun hürriyetine bi’l-muvâcehe hükmolundukda vâki‘ hâl bi’t-taleb kayd olundu ki müzekkir-i mâ-cerâ ola. Tahrîren fî-i hâmisi şehri Şa‘bân li- sene hamse ve elf. Şühûdü’l-hâl: Fahrü’l-müderrisîn Ahmed Efendi, Fahrü’l-müderrisîn Yusuf Çelebi, Mehmed Çelebi b. Ahmed, Mehmed b. Ramazan, Mustafa b. Mahmud, Mehmed b. Hamza.