Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 515 Hüküm no: 618 Orijinal metin no: [107a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Veli’nin menzilini Fâtıma bt. Mehmed’e satması Mahmiye-i İstanbul’da Nişancı Cafer mahallesinde sâkin Mustafa b. Abdullah ile zevcesi olup zâtın ma‘rifet-i şer‘iyye ile ârifân İbrahim Çelebi b. Murad ve Ali b. Mehmed ta‘rîfleriyle mu‘arrefe olan Ayşe Hâtun bt. Veli meclis-i şer‘-i şerîf-i enverde işbu sâhibetü’l-vesîka Fâtıma Hâtun bt. Mehmed muvâcehesinde ikrâr ve takrîr-i kelâm edip zikri âtî akdin sudûruna değin ale’l-iştirâk yedimizde mülkü olup mahalle-i mezbûrede vâki‘ bir tarafdan el-Hâc Ahmed mülkü ve bir tarafdan Haffâf Ahmed mülkü ve bir tarafdan Kasab Serkis mülkü ve bir tarafdan tarîk-i âm ile mahdûd fevkānî ve tahtânî dört bâb oda ve kenîf ve havluyu müştemil mülk menzilimizi bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Fâtıma’ya on bin akçeye bey‘ ve teslîm ol dahi iştirâ ve kabûl ve kabz ve tesellüm edip semeni olan meblağ-ı mezbûr on bin akçeyi yedinden tamâmen alıp kabz eyledik ba‘de’l-yevm menzil-i mahdûd-ı mezbûr mezkûre Fâtıma’nın mülk-i müşterâsı olmuşdur kat‘â alâka ve medhalim yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Şaban b. Ramazan, Himmet b. Musli, Musli b. Mehmed, Ali b. Mehmed, İbrahim b. Murad.