Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 516 Hüküm no: 619 Orijinal metin no: [107a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Süleyman’ın borcuna karşılık câriyesi Fâtıma’yı kızı Emine’ye satması Mahmiye-i İstanbul’da Balaban Ağa mahallesinde sâkine Râbia bt. Süleyman nâm hâtun meclis-i şer‘-i şerîf-i enverde sadriye kızı işbu bâ‘isetü’l-kitâb Emine bt. Mehmed nâm hâtun mahzarında ikrâr-ı tâm ve takrîr-i kelâm edip işbu hâzıra bi’l-meclis açık kaşlı ala gözlü Macariyyetü’l-asl Fâtıma bt. Abdullah nâm câriye-i memlûkemi, kızım mezkûr Emine’ye kırk beş esedî guruşa bey‘ ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr kırk beş esedî guruş cihet-i karz-ı şer‘îden kızım mezkûr Emine’ye zimmetinde edâsı lâzım kırk beş esedî guruş deynim ile takās, ol dahi mukāssa ve kabûl eyledi ba‘de’l-yevm câriye-i mezbûr mezkûre Emine’nin mülk-i müşterâsıdır keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed b. Hızır, Mustafa Beşe, Ali Beşe, Şâhin Ağa b. Abdullah.